Médicos de Urxencias piden mellorar as súas condicións de traballo polos cambios da sanidade nos últimos 15 anos

Os médicos dos servizos de Urxencias do sistema sanitario público de Galicia reclaman da Xunta a revisión e actualización das súas condicións de traballo, que permanecen inalterables desde 2008 a pesar dos enormes cambios que a sanidade experimentou nos últimos 15 anos.

As condicións de traballo dos facultativos destes servizos réxense por un acordo alcanzado co Servizo Galego de Saúde en 2007, que foi revisado ao ano seguinte pero que permanece sen cambios desde entón a pesar de que aspectos como o aumento da demanda asistencial, o envellecemento da poboación galega ou a aparición de novos métodos de diagnóstico e de tratamento de pacientes fan que a situación actual sexa moi diferente á de hai 15 anos.

Representantes dos médicos de Urxencias do sistema sanitario público galego e de O´Mega -o único sindicato médico con representación en Galicia- reuníronse coa directora de Recursos Humanos do Servizo Galego de Saúde (Sergas), Ana Comesaña, para trasladarlle a necesidade de actualizar o acordo alcanzado en 2007 polo que se regula a xornada laboral, as retribucións e as condicións de traballo dos facultativos dos servizos de Urxencia dos hospitais.

Os médicos presentaron á responsable de Recursos Humanos do Sergas un documento elaborado co consenso dos servizos de Urxencias de Galicia e o sindicato O´Mega no que se describían as propostas e reivindicacións do colectivo sanitario e que podería servir de base para a reapertura da do diálogo na Mesa Sectorial.

Ante a falta de resposta por parte da Administración galega, o sindicato O´Mega optou por trasladar a preocupación do colectivo médico aos sindicatos representados na Mesa Sectorial da Sanidade de Galicia -CC.OO., UXT, CIG e CSIF- para que apoien unha reivindicación que repercutiría na mellora das condicións de traballo dos profesionais de Urxencias e, con iso, na asistencia que reciben os usuarios da sanidade pública en Galicia.