O alcalde galego de Xenebra e Goretti Sanmartín destacan que "as persoas" son o centro dos seus modelos de cidade
Alfonso Gómez, nacido en Corme, tamén abordou co presidente da Fegamp a situación política e administrativa de Suíza.
Por E.P. | Compostela | 24/10/2023 | Actualizada ás 16:06
O alcalde galego de Xenebra, Alfonso Gómez, e a alcaldesa de Santiago de Compostela, Goretti Sanmartín, puxeron en común os seus modelos de cidade que, segundo afirmaron, pasan por primar que as persoas estean no centro.
"Hai que ir a cidades máis saudables, que se poidan andar, fronte á presenza excesiva do vehículo particular; cidades que loiten contra a emerxencia climática, que poidan ir a outras maneiras de integrar a natureza, non só en zonas e parques verdes como facemos en Santiago, senón tamén na propia trama urbana", defendeu a rexedora compostelá.
Ademais, no encontro que mantiveron este martes antes de que o alcalde da cidade suíza asinase no libro de honra do Concello, ambos os mandatarios dialogaron tamén sobre as conexións aéreas entre Santiago e o país helvético.
Para Alfonso Gómez, nacido en Corme, os eixos da súa política "na cidade máis densa de Suíza" pasan por un "tipo de modernización respecto da emerxencia climática", o que leva a "outro tipo de mobilidade", así como a "espazos máis verdes". Outra das súas prioridades fíxase no ámbito social. Do mesmo xeito, tamén defendeu como "imprescindible" evitar guetos dentro das cidades.
Así mesmo, Sanmartín asegurou que se comprometeron a seguir en contacto para outros proxectos que poidan xurdir en común entre dúas cidades de dous Estados diferentes que "teñen á fronte a dúas persoas galegas e que comparten moitas outras cousas en común".
RECIBIMENTO FEGAMP
O alcalde de Xenebra tamén foi recibido este martes polo presidente da Federación Galega de Municipios e Provincias (Fegamp), Alberto Varela, e o vicepresidente da institución, Secundino García.
