Unanimidade no Parlamento para pedir a creación de unidades multidisciplinares da dor en todas as áreas
Por Europa Press / Redacción | SANTIAGO DE COMPOSTELA | 26/10/2023 | Actualizada ás 15:58
Os tres grupos no Parlamento galego aprobaron este xoves, en Comisión, unha proposición non de lei para reclamar a creación de unidades multidisciplinares da dor en todas as áreas sanitarias.
A iniciativa foi defendida pola deputada popular Encarna Amigo, que lembrou que en torno ao 20 por cento da poboación adulta sofre dor crónica, unha cifra que pode elevarse ata o 22 por cento no caso de Galicia, segundo os datos da Sociedade Galega de Dor e Coidados Paliativos.
O tratamento desta patoloxía, lembrou Amigo, "é un dos procesos que require a intervención de diferentes especialidades que traballen en estreita colaboración cos médicos de familia", unha atención "integral e multidisciplinar" que mellore a vida do paciente e vaia acompañada de actividades informativas, docencia e investigación.
Tanto BNG como PSdeG mostráronse de acordo con esta petición, aínda que fixeron fincapé en que estas futuras unidades necesitan "recursos" para funcionar.
En concreto, o deputado socialista Julio Torrado, que lembrou que esta iniciativa xa se trouxo "fai tres anos" por parte do PSdeG ao Parlamento, reclamou "máis especialización e máis recursos" para estes pacientes, así como un "mellor acceso a tratamentos". "As unidades son palabras abstractas se non van acompañadas de nada", advertiu.
Pola súa banda, a nacionalista Iria Carreira pediu que as unidades multidisciplinares, que teñen un "efecto multiplicativo" na asistencia a pacientes, "non se limiten a iso". "Deberían ser o habitual e non a excepción", destacou.
