Por E.P. | SANTIAGO DE COMPOSTELA | 30/10/2023 | Actualizada ás 20:41
Decenas de troitas apareceron mortas nas primeiras horas deste luns, 30 de outubro, na canle do río Xuvia, ao seu paso polos municipios de San Sadurniño e Narón.
Polo momento descoñécese o motivo, pero algunhas fontes consultadas por Europa Press estimaron que esta situación podería ser consecuencia do incendio ocasionado na tarde deste domingo na planta que a empresa Sogarisa ten no polígono das Somozas, xa que parte dos líquidos inflamables que estaban nestas instalacións acabaron na rede de rede de sumidoiros e crese que estes puideron acabar sobre o río Xuvia.
Desde a Sociedade Caza e Pesca Xuvia, o seu vicepresidente, Eloy Saavedra, expresou o "bastante preocupados" que estaban tras este incendio. "A sorte foi que o caudal estaba moi alto, polo que estimamos que isto vai minimizar as consecuencias", engadiu.
De todos os xeitos, considera que os produtos vertidos "van chegar á ría, antes ou despois", algo que xa comentaron aos mariscadores.
Saavedra explicou que "Augas de Galicia ten unha rede de caudais de seguimento dos ríos", pero agora mesmo "non" saben "canto leva" o río Xuvia, porque "sobre hai un ano e medio foi anulada" esta sonda.
"Todos os acontecementos que están a pasar nas Somozas son como un buraco negro, e estanse producindo uns feitos que espero que a Fiscalía acabe por actuar, xa que isto non é nin medio normal", agrega.
Por outra banda, a Confraría de Barallobre, en Fene, púxose en contacto co 112 para informar desta mortalidade e que desta forma manteranse "vixiantes", porque hai bancos marisqueiros na desembocadura do río.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.