Convocadas as axudas para que empresas e sindicatos promovan a prevención de riscos laborais

O Diario Oficial de Galicia (DOG) publica este martes a convocatoria coa que a Consellería de Promoción do Emprego e Igualdade destinará un total de 604.184 euros a impulsar a formación e información na prevención de riscos laborais e consolidar a cultura da seguridade, sobre todo entre pequenas e medianas empresas.

Serán beneficiarias desta orde asociacións sindicais e empresariais intersectoriais e sectoriais, fundacións sectoriais paritarias para a promoción da prevención e asociacións profesionais de persoas traballadoras autónomas. O prazo para a presentación de solicitudes será dun mes, polo que permanecerá vixente ata o próximo 31 de novembro. A Xunta outorgará anticipos do 100 % para financiar accións desenvolvidas do 1 de xaneiro de 2023 ata o 31 de outubro de 2024.

Grazas a eses apoios, financiados con fondos estatais, as entidades recibirán achegas para desenvolver iniciativas de información e formación no cumprimento da normativa, a través do deseño de métodos e contidos para programas de prevención de riscos. No caso das organizacións intersectoriais, a maiores, financiaranse outras actuacións de asistencia técnica de carácter gratuíto. Neste caso dirixiranse ao estudo e resolución de problemas derivados da aplicación de medidas preventivas e estarán abertas a persoas traballadoras e/ou empresas.

Con esta iniciativa, o Goberno galego destaca que fomenta a prevención de riscos laborais co obxectivo de promover melloras nas condicións de traballo e elevar o nivel de protección, de seguridade e saúde laboral. As medidas diríxense principalmente ás pequenas e medianas empresas maioritarias na configuración do tecido produtivo. As axudas, financiadas con fondos estatais, súmanse ás convocadas este ano pola Comunidade con máis de 1,6 millóns.

Traballador limpando cristais | Fonte: GOBERNO DE ESPAÑA - Arquivo