Médicos amosan o seu "absoluto rexeitamento" á posible transferencia competencial da xestión do MIR a Galicia
A Federación de Asociacións Científico Médicas Españolas (FACME) advirte de que a posible transferencia competencial ás CCAA traería consigo "desigualdades" na formación e unha falta de cohesión nos estándares de calidade ao longo do país.
Por Europa Press / Redacción | SANTIAGO | 08/11/2023 | Actualizada ás 19:59
A raíz do acordo de investidura alcanzado entre o PSOE e o BNG, onde se abre a posibilidade de renegociar a transferencia da xestión do MIR a Galicia se así o aproba por unanimidade o Parlamento galego, a Federación de Asociacións Científico Médicas Españolas (FACME) manifestou o seu "absoluto rexeitamento" a esta posible transferencia competencial, xa que "que poría fin a un modelo de éxito que leva instaurado máis de 40 anos".
Como en anteriores ocasións nas que se deslizou unha posible transferencia MIR ás CCAA sen que se chegase a concretar ningunha proposta, FACME lembra que o actual modelo centralizado "está amplamente consolidado no Sistema Nacional de Saúde (SNS), conta cun amplo respaldo da profesión médica e un gran prestixio internacional".
Segundo FACME, a configuración deste sistema permite o acceso á Formación Sanitaria Especializada "en condicións de igualdade" para todos os aspirantes, polo que "facilita unha formación de calidade que se basea en méritos e concorrencia competitiva en todo o SNS". Por tanto, para a federación, a posible transferencia competencial ás CCAA traería consigo "desigualdades" na formación e unha falta de cohesión nos estándares de calidade ao longo do país.
Ademais, sinalan que esta descentralización podería "debilitar" a mobilidade de profesionais sanitarios e dificultar a homologación de títulos. "Tamén hai que ter en conta a complexidade que suporía organizar un exame MIR en cada comunidade autónoma e os custos asociados ao mesmo, polo que sería unha decisión altamente ineficiente", sinalaron. Estas consecuencias afectarían tanto aos médicos especialistas como aos centros docentes e, por extensión, a todo o sistema sanitario, o que terminaría afectando tamén os pacientes, destinatarios últimos do mesmo.
Por último, lembraron que a acreditación, avaliación e elaboración dos programas docentes "deben ser de ámbito nacional", polo que "é o Ministerio de Sanidade, en base ás recomendacións das Comisións Nacionais da Especialidade, quen debe establecer as bases comúns do réxime laboral e dos aspectos formativos para todo o territorio", aseguraron. Así mesmo, descentralizar o MIR provocaría que coexistisen programas de formación diferentes, xa que cada comunidade tería o seu.
Por todo iso, xeraríanse diferenzas nos sistemas de avaliación, dando lugar a que a nota final dun residente puidese ser diferente dependendo da comunidade autónoma onde se formou. Ademais, habería variacións nos criterios de acreditación de unidades docentes, o que podería implicar formar a máis residentes por motivos asistenciais, aínda que os centros non reunisen as condicións necesarias para iso.
Así, FACME insta as autoridades responsables a considerar "as graves implicacións" desta proposta e a dialogar "con todos os actores relevantes", incluíndo aos profesionais médicos, para atopar solucións "que preserven a calidade e equidade na formación de médicos en España".
