Por Europa Press / Redacción | A CORUÑA | 14/11/2023 | Actualizada ás 20:01
Un home acusado de abusar sexualmente dun menor, en agosto de 2020, no partido xudicial de Ferrol, foi absolto pola Audiencia Provincial da Coruña, segundo recolle a sentenza á que tivo acceso Europa Press.
A defensa pedía a súa absolución fronte ao criterio de Fiscalía e acusación particular que solicitaban dez anos de cárcere. No xuízo, o home recoñeceu ter unha relación co mozo, que tiña 14 anos no momento dos feitos, pero sostivo que descoñecía a súa "idade real".
"Nunca, nunca souben que era menor de idade", afirmou. Tamén dixo que era unha persoa nova, "adolescente, pero acorde a 18 anos". No entanto, pediu perdón ao mozo e á súa familia tras explicar que foi o denunciante quen lle escribiu.
En contraposición aos argumentos de Fiscalía, quen considerou "coherente" a declaración do mozo, o avogado da defensa, Alejandro Seoane, insistiu na ausencia dunha "proba directa". Tamén apuntou ás características físicas do mozo e aos 18 anos que aparecían "á vista" no seu perfil de Internet para soster que había "uns cuantos motivos" para que o seu cliente pensase que era maior de idade.
A esta cuestión fai referencia o fallo, que incide en que "non se acreditaron as circunstancias fácticas que permitisen requirir das acusado verificacións sobre a idade real da outra persoa". Ademais, sostén que existen elementos que "apuntan ao contrario".
Tamén indica que o mozo "non só mentiu" sobre a súa idade, "senón que despregou algún tipo de acción falsaria para conseguir accceder á plataforma -- pola que contactaron-- que prohibe expresamente, como el sabía o acceso a menores". "Continúa coa mentira indicando no seu perfil a idade de 18 anos", recolle a sentenza que traslada a "dúbida" sobre que existisen datos que permitisen sospeitar da súa idade.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.