A XV edición de Santiago (é) tapas celebrarase entre o 15 de febreiro e o 3 de marzo e centrarase nos doces
Por Europa Press / Redacción | SANTIAGO DE COMPOSTELA | 15/11/2023 | Actualizada ás 15:46
A XV edición de Santiago(é)tapas celebrarase entre o 15 de febreiro e o 3 de marzo de 2024. Así o anunciaron a concelleira de Turismo, Míriam Louzao, a presidenta da Asociación Hostalaría Compostela, Sara Santos, e a xerente de Turismo de Santiago, Flavia Ramil, que compareceron este mércores en rolda de prensa no Pazo de Raxoi.
Tal e como apuntaron, o concurso de tapas de Santiago viviu varios cambios de datas desde o seu comezo. As primeiras edicións celebráronse na primeira quincena de xullo, xa que hai 15 anos o sector consideraba que nesas datas non había suficiente actividade na cidade. Nos últimos anos, o certame celebrouse no mes de novembro "co obxectivo de colaborar na desestacionalización turística da cidade en tempada baixa".
Con todo, explican que nas dúas últimas edicións, unha vez pasado o coronavirus e coa reactivación plena do sector turístico na cidade, o concurso sufriu un "estancamento" no número de establecementos participantes debido, principalmente, a que neste mes o sector xa ten un volume de actividade importante. "A razón fundamental deste cambio é unha razón moi positiva para Compostela", xustificou Louzao a este respecto. Pola súa banda, Flavia Ramil apuntou que xa está aberto o período de inscrición do concurso, que finalizará o 10 de xaneiro.
Sara Santos indicou que a Asociación busca "involucrar o máis posible a todo o sector hostaleiro". "Ademais, tendo en conta o cambio de hábitos da clientela nestes anos que fixo que moitas cafetarías e locais céntrense actualmente en almorzos, brunchs e merendas, ou o chamado tardeo, imos darlle máis protagonismo ás propostas doces", avanzou. Farano co Premio á Tapa + Doce e un tour que percorra eses locais, "convencidos de que dará a oportunidade de presentar propostas moi interesantes e abrirá o concurso a un público máis familiar".
