Por Europa Press / Redacción | SANTIAGO DE COMPOSTELA | 23/11/2023 | Actualizada ás 11:07
A Confederación Estatal de Sindicatos Médicos (CESM) en Galicia acusa ao Servizo Galego de Saúde (Sergas) de "blanquear" e "manipular" as listas de agarda cirúrxica ao non publicar as non estruturais, que son as de pacientes que rexeitan ser intervidos por razóns non atribuíbles ao sistema, é dicir, que non queren ser derivados a outros centros nin a outras áreas por diferentes motivos.
Nun comunicado, CESM lamenta a "propaganda" da Xunta "presumindo" de ser a segunda comunidade con menor demora --66 días de media, só por detrás de Madrid-- no informe publicado a semana pasada polo Ministerio de Sanidade.
O sindicato médico ve estes datos unhas "verdades a medias" porque "só busca réditos políticos" e "en ningún caso" a mellora da asistencia nin do traballo dos profesionais. Así, a organización esixe que se publiquen as listas de espera non estruturais, ás que habería que sumar as máis de 47.000 persoas das estruturais.
"CESM considera que non é xusto, nin ético, nin moral que se faga esta basta manipulación publicitando só as listas de espera estruturais, e mantendo ocultas as inmensas listas de espera de pacientes que a propia administración sanitaria tentou derivar a operarse a outros hospitais e que estes pacientes, pola súa confianza nos médicos que os atenderon e no merecido prestixio dos nosos recursos público e nas súas circunstancias persoais, non aceptasen", denuncia a central.
O sindicato sospeita tamén que todos eses "pacientes desaparecidos para maquillar as estatísticas" correspondentes a 2023, que serán "as últimas que se coñecerán" antes das eleccións autonómicas en Galicia, reaparecerán "moi probablemente" a partir do 1 de xaneiro de 2024.
Precisamente, hai uns días transcendía que a Asociación de Pacientes e Usuarios do CHUS (Complexo Hospitalario Universitario de Santiago) presentara un recurso ante un Xulgado do Contencioso-Administrativo para que o Sergas publique toda a información sobre as listas de espera, estruturais e non estruturais, despois de solicitala pola Comisión de Transparencia de Galicia.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.