A eurodeputada Ana Miranda alerta do perigo de "banalizar e negar" a violencia de xénero
A eurodeputada do BNG di que "a pesar dos datos de mulleres asasinadas, de denuncias formuladas e de sentenzas condenatorias, atopamos a negación ou a banalización por parte de determinados políticos de extrema dereita".
Por E.P. | SANTIAGO DE COMPOSTELA | 23/11/2023 | Actualizada ás 17:05
A eurodeputada do BNG, Ana Miranda, alertou este xoves na Eurocámara de que o asasinato de mulleres (dúas en Galicia das 51 de todo o Estado) é "só a punta do iceberg do machismo que impregna toda a sociedade, xa que detrás dos números hai vidas botadas a perder polo terrorismo machista".
No debate sobre o Día Internacional contra as violencias machistas, Miranda destacou que neste 25 de novembro é necesario denunciar que os feminicidios son a cara visible dunha violencia "brutal e transversal que atravesa todas as esferas da sociedade, unhas máis visibles e outras invisibles, sutís, ocultadas", que se traducen en que só en Galicia, no primeiro semestre de 2023, houbo máis de 3.400 denuncias por violencia machista.
"A pesar dos datos de mulleres asasinadas, de denuncias formuladas e de sentenzas condenatorias, atopamos a negación ou a banalización por parte de determinados políticos de extrema dereita", lamentou a eurodeputada, que criticou, ademais, os pactos de PP e Vox para "eliminar orzamentos destinados ás mulleres vítimas de violencia de xénero alí onde gobernan".
Para Miranda, "non é de recibo" a posición do Consello nas negociacións da futura directiva europea de violencia contra as mulleres que, segundo sinalan, oponse a que a violación sexa considerada delito.
"Consideramos que se trata dun aspecto fundamental (...). Temos que seguir pondo as lentes violeta para detectar todas as condutas machistas e loitar contra elas, xa que só así conseguiremos unha sociedade máis igualitaria para todas", defendeu.
