Por E.P. | SANTIAGO DE COMPOSTELA | 28/11/2023 | Actualizada ás 13:55
Un estudo elaborado por un equipo de investigación da Universidade de Santiago de Compostela encargado pola Xunta estima que a rebaixa do IVE do 10 ao 5% para os produtos pesqueiros para o seu traslado ao consumidor final aumentaría o valor engadido en 28,5 millóns, crearía 5.575 empregos e reduciría a recadación fiscal en 17,8 millóns.
O conselleiro do Mar, Alfonso Villares, presentou este martes nun supermercado de Santiago as conclusións da análise elaborada polo Grupo de Investigación de Economía Pesqueira e Recursos Naturais da USC liderado por Gonzalo Rodríguez, Andrés González, María do Carme García Negro xunto co economista e expresidente da Xunta Fernando González Laxe.
O estudo traslada a varios supostos a redución do IVE que reclama a Xunta para proxectar que impacto tería a medida de porse en práctica a través da análise do comportamento da economía galega a nivel macro e micro.
A simulación foi levada a dous escenarios "extremos", segundo explicou a Administración autonómica nun comunicado. Por unha banda, un onde o traspaso da redución do IVE é asumida na súa totalidade ao consumidor final e, por outro, un onde as empresas o interiorizan na súa totalidade nas contas.
No primeiro caso, o impacto directo, indirecto e inducido no conxunto da economía galega implicaría unha caída da recadación fiscal de 17,8 millóns en Galicia e un incremento total do valor engadido (VAB) positivo de 28,5 millóns de euros, así como a posibiliad de xerar ata 5.575 empregos entre pesca e actividades derivadas.
No segundo suposto, o incremento do VAB sería de 19,1 millóns no conxunto da economía, con ata 1.232 postos de traballo adicionais potenciais e un custo fiscal de 33,8 millóns de euros. Os encargados do estudo conclúen que o traslado real estaría máis preto do primeiro escenario que do segundo como, din, extráese da análise das consecuencias de medidas similares para outros produtos.
Así pois, o conselleiro do Mar incidiu en que este novo estudo súmase a outros elaborados pola Comisión Nacional do Mercado de Valores (CNMV) ou o Observatorio Europeo do Mercado dos Produtos de Pesca e Acuicultura qu apoian a postura da Xunta en defensa dunha rebaixa do tipo para os produtos do mar.
Outra das cuestións resaltadas sobre o Estudo por parte do Goberno galego é que a simulación apunta a un maior impacto da medida no sector de alimentos procesados, ademais de que tería efectos "multiplicadores" en hostalaría ou transporte. En canto aos efectos microeconómicos, estima nun 5% o incremento do consumo en produtos de pesca de baixura, 3,4% na de litoral, 3,2% en altura e máis dun 4% para acuicultura.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.