O deán da Catedral de Santiago, sobre o aceso de luces nas cidades: "O Nadal aínda non empezou, é tempo de advento"
Aberto ata o 8 de xaneiro o belén da Catedral de Santiago, o cal conta con 400 figuras de barro, cerámica e tea.
Por Europa Press / Redacción | SANTIAGO DE COMPOSTELA | 07/12/2023 | Actualizada ás 16:39
O deán da Catedral de Santiago, José Fernández Lago, aproveitou a inauguración do belén desta institución eclesiástica, o cal se instalou na igrexa de San Agustín, para realizar unha reflexión sobre o Nadal e o significado deste tempo máis aló das celebracións. Así, e nun contexto de 'carreira' nos acesos do Nadal das cidades, o deán advertiu que o Nadal "non empezou" aínda que se alumaron as cidades. "É tempo de advento", salientou, en referencia ás semanas previas nas que os cristiáns se atopan en tempo de 'espera' para o 'nacemento' de Xesús.
"Quero dicir que o nadal non empezou porque algunha xente diga que acenden as luces da súa cidade; senón que o nadal é o 24 e 25 de decembro", manifestou o deán da Catedral, na súa intervención, antes da bendición do belén. Así, o acto relixioso do belén, ao que asistiu o director de Turismo de Galicia, Xosé Merelles, dá por inaugurado esta representación que poderá visitarse ata o 8 de xaneiro.
BELÉN ESTILO NAPOLITANO
Trátase dun belén de estilo napolitano de 50 metros cadrados con aproximadamente 400 figuras feitas con barro, cerámica e tea. Segundo Noelia, unha das traballadoras da Catedral responsable do belén, ademais das figuras, a base está feita de cortiza e brión natural. Así mesmo, a metade das figuras están en movemento, polo que o traballo de instalación levoulles unhas tres semanas. "É algo laborioso. Hai que facer a instalación eléctrica e o río tamén leva o seu tempo", declarou a responsable, que ademais explicou que son un equipo de seis persoas na montaxe. Este é un dos tres beléns da Catedral, que anteriormente se situaba no Mosteiro de San Martiño Pinario. Segundo a traballadora da Catedral, contan con outro de maior tamaño no que as figuras son de cerámica e non son articuladas, pero "a idea é montar ese o ano que vén".
