Galicia sumará 50 axentes á Policía Autonómica

O presidente da Xunta, Alfonso Rueda, anunciou que o Ministerio de Interior comunicou por carta ao Goberno galego o seu compromiso de adscribir 50 axentes á Policía Autonómica. "Desde a Xunta só pedimos o que corresponde. E cando nos dan o que cremos que é xusto, queremos recoñecelo", admitiu o presidente galego no acto de gradación da XV Promoción de Policías Locais, celebrado na Estrada na Academia Galega de Seguridade Pública (Agasp).

Alí, Rueda valorou o "cambio importante" de postura do Goberno central para "atallar o enorme problema de seguridade" que supón, dixo, a redución de efectivos na comunidade. Neste sentido, lembrou a reclamación da Xunta desde "hai moito tempo" ao Executivo central para que a Policía Autonómica "deixase de perder tantos efectivos" en Galicia. Ademais, segundo trasladou a Xunta nunha nota de prensa, Rueda puxo en valor o papel que desenvolve a Policía Local para garantir a seguridade da cidadanía en toda a Comunidade, á vez que a erixiu como un alicerce "fundamental" para a sociedade.

"Galicia é un lugar seguro e queremos que o siga sendo e isto depende de moitos factores, pero o primeiro e fundamental, das forzas e corpos de seguridade do que formades parte", aseguroulles Rueda durante este acto, no que estivo acompañado polo vicepresidente primeiro e conselleiro de Presidencia, Xustiza e Deportes, Diego Calvo. Na súa intervención, o mandatario galego tamén subliñou a calidade da formación que recibe este corpo de seguridade na Agasp, academia que lembrou que xa leva formados a case 2.000 axentes a través das "excelentes promocións" nos seus 30 anos de vida.

O SUP DI QUE NON SE CUMPREN AS EXPECTATIVAS

O Sindicato Unificado de Policía (SUP) considera que o anuncio do Ministerio do Interior de sumar 50 efectivos á Policía Autonómica, avanzado este martes polo presidente da Xunta, Alfonso Rueda, non colma as súas expectativas. Nunha nota de prensa, o SUP lembra que leva anos reivindicando a cobertura das prazas a través do concurso establecido, "pedindo igualar a ocupación á media que presentan os persoais de Policía Nacional", que en Galicia, apunta, sitúase "preto do 90 %". Con todo, si cre que esta convocatoria, en caso de levarse a efecto no número anunciado, suporía "un alivio" de face aos próximos meses nas distintas xefaturas provinciais e locais da Unidade.