Que din os informes da UDC e da UVigo sobre a toxicidade dos microplásticos?

Informes realizados pola Universidade da Coruña (UDC) e a Universidade de Vigo (UVigo) confirman que os pélets que chegan ás praias galegas tras a vertedura do buque 'Toconao' son polietileno "pouco tóxico" con aditivos "pouco solubles". A vicepresidenta segunda e conselleira de Medio Ambiente, Territorio e Vivenda, Ángeles Vázquez, declaraba este martes que poría o material a disposición das universidades que así o solicitasen para a súa correspondente análise.

Con todo, esta semana a Universidade de Santiago de Compostela non tiña constancia de que se recibise ningún tipo de información relativa aos pélets para levar a cabo as probas. Pola súa banda, a Universidade de Vigo si fixo unha primeira análise, aínda que en base ao informe publicado pola Xunta de Galicia o 9 de xaneiro. 

En concreto, o grupo Ecotox, dependente do centro universitario, é o encargado destas labores e espera poder facer unha análise directa da composición dos pélets. Precisamente este martes publicaban unha valoración da composición, "ciñéndose e baseándose na composición que a Xunta indicaba que tiñan os microplásticos e que se recolle no citado informe".

Detallan que a súa matriz é o polímero máis común, o polietileno, "completamente inofensivo", pero con entre un 10 % e un 13 % dun aditivo químico utilizado como estabilizador de luz ultravioleta. Este aditivo denominado UV622 (número CAS 65447-77-0)m é á súa vez un polímero non biodegradable con dúas compoñentes, ácido succínico, un ácido orgánico sen problemas toxicolóxicos, e unha sustancia sintética da familia das aminas aromáticas que lle confire o seu carácter antioxidante (número CAS 52722-86-8).

Esta sustancia está clasificada pola Axencia Europea de Sustancias Químicas como unha sustancia con toxicidade crónica ("é dicir, só sería tóxica nunha exposición prolongada, o que non ocorre con tarefas específicas de limpeza"), e irritante para os ollos ("polo que se debe tomar esta precaución nas actividades de limpeza").

Segundo este mesmo expediente, a súa toxicidade para a Daphnia (un invertebrado acuático que se utiliza como modelo para avaliar a toxicidade dunha sustancia) tería unha CE50 (concentración que provoca o 50% de mortalidade) de 160 mg/L, "o que a categorizaría como pouco tóxica". A ficha técnica de seguridade de UV622 mostra unha toxicidade para Daphnia de EC50=25 mg/L, o que a diferenza da anterior clasificaríao nun nivel medio de toxicidade acuática. "En calquera caso, non se espera que se alcancen estes niveis en costas abertas", insisten.

"Ningún dos documentos anteriores proporciona información experimental sobre a toxicidade en organismos mariños. Actualmente o grupo Ecotox está a realizar probas de toxicidade con modelos representativos de fitoplancto e zooplancton para cubrir este baleiro", informan. Concellos como os da Coruña e Vigo avanzaran que tamén pedirían os seus propios informes de toxicidade, pero aínda non se concretaron actuacións.

INFORME UDC

Así mesmo, a Universidade da Coruña (UDC) fixo público o informe científico técnico de caracterización química de pélets recolleitos na praia de Nemiña, en Muxía. Neste caso, as análises realizadas identificaron polietileno e o aditivo atopado en maior proporción é o coñecido comercialmente como 'Tinuvin 622'. Tal e como detalla a UDC no seu informe, este aditivo emprégase como fotoestabilizador de base amina na fabricación de plásticos. A súa solubilidade en auga é baixa ou "pouco soluble".