Traballadores sociais piden que a Xunta "rectifique" a información do Bono Coidado: "non é unha axuda nova"

O Colexio de Traballo Social de Galicia remitiu á Xunta un escrito no que solicitan que "rectifique" e "aclare" os termos de solicitude do Bono Coidado non Fogar, argumentando que "non é unha axuda nova", se non "unha actualización das libranzas" que está "a saturar" os servizos sociais de peticións e consultas.

Segundo trasladou a Europa Press Cristina Díaz, membro da Xunta de Goberno deste colexio profesional, cando os traballadores coñeceron o anuncio da Xunta deste bono pensaron que "era algo novo", adicional ás prestacións existentes. "Pero lendo a letra pequena, descubrimos que só é unha adaptación da normativa estatal á galega", afirma Díaz.

A modificación estatal da normativa reguladora da Lei de Dependencia, apunta a mesma profesional, incrementou o prezo de hora de libranza para cada grao de dependencia, elevando a contía máxima para grandes dependentes ata os 5.000 euros anuais, o importe deste bono.

Con todo, apuntan, o anuncio por parte da Xunta do Bono Coidado non Fogar xerou "unha avalancha" de consultas de usuarios que crían que se trataba de "unha axuda adicional" ás libranzas que xa tiñan concedidas, xerando "saturación" nos Servizos Sociais. "Ao recibir a carta do presidente, acudiron en avalancha a solicitar esta suposta nova axuda", apuntou Cristina Díaz.

A isto contribuíu, explican, cuestións como que teña "un nome propio", sen facer referencia á libranza de ciudados, polo que pediron á Xunta que "explique claramente á xente en que consiste" e que, para obtela, "deben renunciar a outros servizos" adicionais que desde o Colexio profesional defenden como "máis idóneos".

A contía, admiten estes profesionais, "vai ser automática nos casos nos que xa se teña concedida" a libranza. Con todo, aqueles dependentes que desexen cambiar un servizo adicional cara á libranza "teñen que facer un percorrido" que ten "unha demora bastante grande", de en torno "a un ano".

O Colexio profesional púxose en contacto coa Xunta mediante un escrito para solicitar "unha rectificación dos termos" así como do tratamento que se dá ao papel dos traballadores sociais na carta que se remitiu aos dependentes. Para Cristina Díaz, redúceselles a un labor "administrativo" de "tramitación deste bono", co consecuente "desprestixio" da súa actividade profesional. Tamén reclamaron unha "formación de carácter inmediato" para os profesionais en relación a estas "supostas novidades do sistema".

A XUNTA DESTACA A EXTENSIÓN A TODOS OS NIVEIS

En relación a esta cuestión, a Consellería de Política Social asegurou que "non é certo" que o Bono Coidado sexa "un incremento obrigado pola Lei de Dependencia", dado que, lembraron, os 5.000 euros serán universais con independencia do nivel de dependencia do receptor, e non só para os grandes dependentes.

"A proba é que Galicia é a única comunidade que lanzou esta medida universal para todas as persoas que teñan dependencia recoñecida e estean a ser atendidas no seu fogar, independentemente do seu grao ou situación económica", destacaron as mesmas fontes, consultadas por Europa Press.

As persoas que eran beneficiarias da denominada 'libranza de coidados', "xa están a recibir neste mes de xaneiro esta axuda sen realizar ningún trámite", unhas 18.000 persoas, calcula o Goberno galego. Aqueles dependentes que estean a recibir outra prestación e queiran cambiarse, ou que non teñan recoñecida dependencia, deberán solicitar este cambio primeiro nos servizos municipais do seu concello ou do centro de saúde, lembra a Xunta.

Política Social lembrou tamén que o novo decreto de dependencia en Galicia "axilizou os trámites" para este proceso, reducindo "a carga burocrática" dos solicitantes, fusionando o recoñecemento do grao e o servizo asignado e reforzando os órganos de valoración, entre outras cuestións.

Finalmente, a Xunta afirmou que "desde o primeiro día" informouse a través da plataforma informática aos traballadores sociais desta nova prestación, aínda que non descartaron "axustar todos aqueles aspectos informativos" que sexan necesarios.

Na rolda de prensa posterior ao Consello da Xunta, o presidente, Alfonso Rueda, lembrou que o seu compromiso foi pór en marcha esta medida no mes de xaneiro, unha vez aprobados os orzamentos, e criticou que os grupos da oposición estean "moi enfadados" por unha medida que "a xente que o recibe agradéceo moito" e que é "unha medida de xustiza".

Traballadora social atende unha usuaria nos servizos sociais | Fonte: arquivo