Os alumnos que fagan o Bacharelato STEM terán 6 créditos en universidades públicas galegas
Actualmente, hai 775 estudantes que cursan o bacharelato STEM nos institutos galegos, 449 deles no segundo ano.
Por E.P. | SANTIAGO DE COMPOSTELA | 18/01/2024 | Actualizada ás 18:35
Os alumnos que opten por estudar o 'STEMBach' obterán ata seis créditos de libre configuración nas universidades públicas galegas. Será unha medida retroactiva, é dicir, que se beneficiarán dela non só os alumnos actuais desta modalidade de Bacharelato de excelencia, senón tamén os que a cursaron e estean xa estudando unha carreira.
Así o anunciou o presidente da Xunta, Alfonso Rueda, quen explicou que se asinarán senllos convenios co tres universidades públicas --Santiago, Vigo e A Coruña-- para outorgar 1,5 créditos por cada curso, ata un máximo de seis.
O 'STEMBach' é un programa formativo de Bacharelato posto en marcha en Galicia no curso 2018/19 que reforza as competencias coñecidas como STEM (ciencia, tecnoloxía, enxeñaría e matemáticas, polas súas siglas en inglés).
Permite que os alumnos teñan, á parte das materias ordinarias, outras específicas relacionadas con estes ámbitos. Ademais, fan un traballo de investigación ao longo dos dous anos que dura o Bacharel.
Actualmente, hai 775 estudantes que o cursan nos institutos galegos, 449 deles no segundo ano. Segundo as estimacións que deu o presidente da Xunta, poderanse beneficiar dos créditos universitarios máis de 1.800 mozos.
Rueda explicou que esta é a "principal novidade" dunha estratexia do Goberno autonómico para fomentar o 'STEMBach' que tamén incluirá outras accións, por exemplo unha entrega duns premios aos mellores traballos de investigación realizados en Bacharelato.
Así mesmo, crearase unha rede de estudantes do 'STEMBach' para fomentar o intercambio de coñecementos e proxectos e recoñecerase, mediante un certificado, ao profesorado que participe no programa.
