Estas son as demandas "prioritarias" que a Federación Galega de Dano Cerebral reivindica a Rueda

Representantes da Federación Galega de Dano Cerebral (Fegadace) aproveitaron a visita do presidente da Xunta, Alfonso Rueda, e da conselleira de Política Social, Fabiola García, á asociación compostelá Sarela para pór sobre a mesa as demandas que este colectivo consideran prioritarias e que van desde un financiamento máis estable a unha comisión parlamentaria permanente sobre discapacidade.

Tras a visita, Rueda e García mantiveron unha reunión de traballo coa vicepresidenta de Sarela, Concha Otero, e co secretario da entidade e presidente de Fegadace, Luciano Fernández, na que se reivindicou a necesidade de situar o dano cerebral adquirido "no centro das políticas públicas sobre discapacidade". Non en balde, é a primeira causa de discapacidade e dependencia en Galicia, con máis de 35.000 persoas afectadas.

Entre outras demandas, tras o encontro, informouse de que se reivindicou a creación no Parlamento de Galicia dunha comisión permanente para persoas con discapacidade que permitiría, entre outros obxectivos, "dotar ás políticas públicas sobre discapacidade dun status prioritario na axenda política e lexislativa". Tamén se considera un instrumento que "fortalecería" a cooperación do Parlamento coas entidades do terceiro sector.

Igualmente, o colectivo aspira a "avanzar" nas políticas de accesibilidade universal, e considera que, unha vez aprobado nesta lexislatura o Proceso Asistencial Integrado do dano cerebral, paso que Fegadace valora de maneira "moi positiva", ve preciso agora "implantalo no menor tempo posible". Facelo esixirá reestruturar os recursos existentes, así como dotarse de novos medios materiais e humanos.

Outra das reivindicacións históricas compartidas con outros colectivos de discapacidade é a de implantar un modelo de financiamento autonómico "estable e sustentable" para poder prestar os servizos que non están incluídos no concerto social.

A recente aprobación do concerto social para a prestación de servizos sociais en Galicia puxo fin únaa situación, admite o colectivo, de "gran incerteza" para o movemento asociativo pero, con todo, apúntase a que son precisos "unha serie de recursos igualmente imprescindibles para garantir a calidade de vida das persoas con dano cerebral".

MÁIS PRAZAS E MELLORA DAS POLÍTICAS DE EMPREGO

A ampliación de prazas públicas nos servizos de atención ao dano cerebral como, por exemplo, os de atención diúrna terapéutica; e a "mellora" das políticas de emprego tamén foron postas na diana. En concreto, Fegadace alertou da "desigualdade" no acceso ao emprego público e das "carencias" do servizo público de emprego na atención a necesidades específicas do colectivo.

A proposta que trasladaron ao presidente da Xunta é a necesidade de incluír os códigos asociados coas secuelas do dano cerebral adquirido nas convocatorias de emprego público destinadas a discapacidade intelectual. Actualmente, Fegadace apunta que as persoas con secuelas cognitivas como problemas de memoria ou concentración teñen que competir con persoas con discapacidade física e que non teñen esas dificultades.

O presidente da Xunta, Alfonso Rueda, comparece tras o Consello | Fonte: XUNTA - Arquivo