Por Europa Press / Redacción | SANTIAGO DE COMPOSTELA | 20/01/2024 | Actualizada ás 10:25
O líder do PPdeG e candidato á reelección como presidente da Xunta, Alfonso Rueda, defendeu ao seu partido como "o mellor" para Galicia nas eleccións autonómicas do 18 de febreiro e cargou contra a oposición. En referencia ao BNG dixo que "apoia aos presos de ETA", mentres que o PSdeG aspira "a ser a sucursal de (Pedro) Sánchez en Galicia".
Así o aseverou Rueda nun acto celebrado na noite deste venres en Pontevedra para presentar a lista dos populares por esta provincia. A candidatura estará encabezada por el mesmo, mentres que de 'número dous' leva á empresaria viguesa Patricia García.
O presidente contrapuxo o PPdeG co que chama o "multipartito" de esquerdas, que "non se parece nin a Galicia nin aos galegos". A todos estes partidos reprochoulles Roda a súa "falta de proxecto" para a Comunidade "máis aló de sacar ao PP" da Xunta.
Son, engadiu, "da escola de Pedro Sánchez". De feito, en referencia ao presidente do Goberno central e líder do PSOE, denunciou as "mentiras" e os "insultos" que, ao seu xuízo, recibiron os galegos nos últimos anos en cuestións como a chegada dos trens Avril, os fondos europeos, o corredor atlántico ferroviario e o operativo para a recollida dos pélets plásticos da costa, entre outras cuestións. "Nin os españois nin os galegos merecemos iso. Xa está ben de pór os intereses persoais dun político por encima de todo e xa está ben de dinamitar a igualdade dos españois", subliñou.
OS CANDIDATOS DO PP, "XENTE COMPROMETIDA"
Neste contexto, Alfonso Rueda enxalzou as candidaturas do PPdeG para o 18F, das cales todos e cada un dos membros --desde os primeiros postos ata os suplentes-- son "o mellor reflexo" de Galicia.
"Son xente comprometida que coñece os problemas dos seus veciños, profesionais de todos os sectores que saben o que precisamos para seguir avanzando e, sobre todo, persoas con experiencia e vocación que non veñen aprender nin a pasar o intre", asegurou o líder do PPdeG.
Tras mencionar a todos as cabezas de lista --xunto a el, a Diego Calvo pola Coruña, a Elena Candia por Lugo e a Elena Rivo por Ourense--, fixo un chamamento a "saír a gañar, con rotundidade, o 18 de febreiro" fronte a todos aqueles que pretenderán "vender artificios" e "erixirse como os únicos con carné de galego".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.