A biopsia líquida permitirá detectar de maneira precoz "ata 20 tipos de tumores": "Haberá cancros que se curen ou se cronifiquen"

O doutor, coordinador científico do Simposio Biopsia Líquida e vicepresidente de Aseica, Rafael López, remarcou o "enorme potencial de crecemento" da biopsia líquida que permitirá, nun futuro próximo, poder diagnosticar precozmente "ata 20 tipoloxías de tumores diferentes". Así o declarou este xoves na presentación do IX Simposio Biopsia Líquida que se desenvolverá desde a tarde deste xoves ata o sábado en Santiago de Compostela e na que participarán máis de 70 expertos en calidade de moderadores ou relatores e asistirán 400 persoas.

Na súa intervención, xunto á responsable da unidade de biopsia líquida do grupo de Oncoloxía Médica Traslacional do CHUS, Laura Muinelo, López detallou as principais novidades do Simposio. Esta cita permitirá debater sobre as iniciativas centradas na estandarización dos protocolos de estudo de biomarcadores circulantes, terá sesións dedicadas a cada tipo de tumor, entre outras.

Ademais, abordarán diferentes temas como a aplicación de estratexias de IA para xerar algoritmos predictivos en base a resultados obtidos, analizando marcadores circulantes e outros datos clínicos, a utilización de biofluídos alternativos ás mostras de sangue ou como determinados estudos de biopsia líquida axudan a comprender os mecanismos de diseminación tumoral e a evolución molecular dos tumores en resposta ao tratamento.

PATOLOXÍAS QUE "MÁIS SE BENEFICIAN"

Rafael López destacou que as patoloxías que "máis se están beneficiando" da evolución do conxunto de técnicas diagnósticas e de tratamento integradas na biopsia líquida son o cancro de pulmón, o de mama, o dixestivo e o xenitourinario. Con todo, recoñeceu que hai tumores como os de páncreas ou os cerebrais nos que a biopsia líquida "presenta limitacións", aínda que a "máis importante" é a "ausencia de tratamentos" dirixidos e efectivos para estes tumores.

Desta forma, explicou, que nestes tumores o desenvolvemento práctico da biopsia líquida irá "moi paralelo" á evolución farmacolóxica. O coordinador científico do Simposio remarcou o esforzo realizado para incorporar os biomarcadores á práctica clínica pero, na súa opinión, sería necesario facer "un segundo esforzo" para promover que a incorporación e financión destes biomarcadores "chegue de forma inmediata" á poboación que os necesite.

Para alcanzalo propuxo promover a incorporación e financiamento inmediato segundo a aprobación dos fármacos pola EMAy. En segundo lugar, establecer centros de referencia para realizar os biomarcadores "máis complexos" e cheguen a toda a poboación, con "independencia do lugar no que se resida".

"HABERÁ CANCROS QUE SE CUREN COMPLETAMENTE"

Rafael López destacou que "indubidablemente" se está "máis preto de controlar o cancro" no sentido de "eliminar o sufrimento" que provoca tanto nos pacientes como na sociedade. "Nun futuro haberá unha porcentaxe importante de cancros que se curen completamente e haberá outra porcentaxe de tumores que se cronifiquen e cuxos afectados acaben falecendo debido a outras causas, aínda que o seu tumor estea activo e controlado", afirmou Rafael López.

Presentación do IX Simponsio Biopsia Líquida en Santiago | Fonte: Europa Press