Por Europa Press / Redacción | SANTIAGO DE COMPOSTELA | 31/01/2024 | Actualizada ás 15:37
A Xunta de Galicia e Editorial Galaxia presentaron a primeira adaptación a novela gráfica do clásico de Xosé Neira Vilas 'Memorias dun neno labrego', realizada por Iria Aldegunde. Ademais deste, e co apoio da Consellería de Cultura, Educación, FP e Universidades, tamén presentaron 'A música dos Valladares. Retratos de familia', por Pablo Bernárdez.
O secretario xeral de Política Lingüística, Valentín García, destacou "a importancia de traer á actualidade e adaptar a todo tipo de público lector, especialmente aos mozos, obras como a de Neira Vilas, que ostenta o título de libro máis lido e traducido da literatura galega". Apuntan que, dirixido a un público novo, esta "innovadora" versión traslada a Balbio, o 'neno de aldea' "máis famoso da literatura galega" ao mundo do cómic a través das ilustracións da compostelá Iria Aldegunde. Na presentación tamén participaron a ilustradora; o presidente da Fundación Xosé Neira Vilas, Fernando Redondo, e o director de Produción de Galaxia, Xesús Domínguez.
Respecto de 'A Música dos Valladores', o representante da consellería remarcou "a necesidade de dar a coñecer a vida e obra dunha familia tan relevante para a cultura galega como foi a dos Valladares, que deixou un importante legado en diferentes facetas do mundo artístico". O volume, no que destacan as ilustracións de Hortensia Fernández, repasa a traxectoria vital e profesional dos irmáns Marcial, Avelina e Sergio a través da súa música.
"Cunha finalidade divulgativa, presenta textos alusivos á biografía dos compoñentes máis destacados desta numerosa familia do século XIX", explican. Cada texto vai a asociado a unha peza musical e unha ilustración. Ademais, as pezas son accesibles mediante descarga a partir dun código QR, tanto en formato audio, como en PDF para as letras e as partituras. Acompañando a Valentín García, tamén estiveron, ademais do autor e a ilustradora, os músicos Cibrán Seixo e Rubén Servide.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.