Fiscalía investiga se promotoras de eólicos en Galicia fixeron informes ambientais, o que a Xunta nega
Argumenta que son elaborados "sempre" por técnicos da administración e que xa remitiu "as aclaracións" pedidas.
Por Europa Press / Redacción | SANTIAGO DE COMPOSTELA | 05/02/2024 | Actualizada ás 14:21
A Fiscalía da Coruña mantén aberta unha investigación para determinar se informes de declaracións de impacto ambiental relativos a parques eólicos en Galicia foron elaborados, nalgún caso, por persoas vinculadas ás empresas promotoras dos citados parques.
Así o adiantou elDiario.es e puido confirmar Europa Press. En concreto, fontes do Ministerio Público precisaron que a Fiscalía Provincial A Coruña abriu unhas dilixencias de investigación preprocesal sobre presuntas irregularidades na emisión dos informes favorables de impacto ambiental da Dirección Xeral de Calidade Ambiental, Sostibilidade e Cambio Climático da Consellería de Medio Ambiente sobre os proxectos eólicos tramitados en 2023.
Tendo en conta a natureza dos feitos, para os efectos de examinar o seu posible incardinación nos delitos contra o medio ambiente dos artigos 329 e 326 bis do Código Penal, asumiu o caso a Fiscalía Provincial de delitos contra o medio ambiente.
DENUNCIA DO SLG
A investigación comezou tras unha denuncia do Sindicato Labrego Galego (SLG) en relación á tramitación dos parques eólicos, ao redor de 120, e en relación á autoría das declaracións de impacto ambiental realizadas a finais de 2022 e principios de 2023.
Fontes do SLG explicaron a Europa Press que analizaron "moitas" delas e comprobaron, nalgúns casos, ao mirar os metadatos, que aparecían "persoas de referencia das empresas que promovían eses parques" en documentos que si estaban asinados polo funcionario público correspondente.
En concreto, aseguraron que en dous deles comprobaron que aparecían persoas vinculadas coas empresas promotoras dos parques, o de Serra da Piñeira e o de Banzas. "Chegamos a sospeitar que estas avaliacións partisen das propias empresas", indicaron sobre a posible autoría e ao asegurar que non descartaron outros casos e que iso motivou a denuncia.
VERSIÓN DA XUNTA
"Noutros casos, os metadatos fannos sospeitar pero non son tan evidentes", aclararon desde o Sindicato Labrego Galego en contraposición coa postura da Xunta que, consultada tamén por Europa Press, asegura que as declaracións de impacto ambiental (DIA) "son elaboradas sempre por técnicos da Xunta de Galicia".
"Xa achegamos á Fiscalía as aclaracións que nos pediu e imos seguir colaborando en todo o que nos solicite para deixar claro que se cumpre a lei en todo o procedemento".
Ademais, precisa que as DIA "redáctanse tomando como base outros documentos elaborados previamente, entre os que se atopan informes presentados prol o promotor en formato PDF, que forman parte do expediente e que teñen que incluírse na declaración de impacto ambiental".
"Na práctica, pode producirse a transferencia de metadatos, datos adicionais que non están á vista e que aparecen ao acceder ás propiedades, duns documentos aos outros", apostila a Consellería de Medio Ambiente. Ademais, recalca que un informe da Axencia para a Modernización Tecnolóxica de Galicia (Amtega) entregado a Fiscalía "determina que unha das operacións na que se trasladan metadatos, como o nome do autor, dun documento a outro é a copia de elementos dun PDF a un documento de Libre Office, que é unha das operacións que se realizan no proceso de elaboración das DIA".
"Por tanto, ese arrastre de metadatos é o que provoca que se transfira a autoría dun documento a outro, aparecendo como autores persoas que nada tiveron que ver coa elaboración da Declaración de Impacto Ambiental".
