Rebaixan de 2,5 a 1,3 anos de cárcere a pena a un mozo que abusou sexualmente da filla da parella do seu pai no Carballiño
O Tribunal Superior de Xustiza de Galicia acorda incrementar as circunstancias atenuantes da condena considerando que se entregou antes do inicio do xuízo unha cantidade económica similar á reclamada como responsabilidade civil, o que constata "o esforzo reparador por parte do acusado".
Por Europa Press / Redacción | OURENSE | 08/02/2024 | Actualizada ás 16:32
O Tribunal Superior de Xustiza de Galicia estimou parcialmente un recurso e rebaixou a un ano e tres meses de cárcere a pena imposta pola Audiencia Provincial de Ourense contra un mozo que abusou sexualmente da filla menor da parella do seu pai. En concreto, a sala acorda incrementar as circunstancias atenuantes da condena considerando que se entregou antes do inicio do xuízo unha cantidade económica similar á reclamada como responsabilidade civil, o que constata "o esforzo reparador por parte do acusado".
Ademais, destaca, hai un "estrito cumprimento da orde de protección acordada" e un recoñecemento desde a primeira declaración dos elementos esenciais do feito delituoso. Isto, determina o fallo, "entraña un comportamento en certo xeito resarcitorio ao corroborar a realidade dos feitos denunciados". Por todo iso, decide incrementar a redución da circunstancia atenuante moi cualificada, reducindo a condena desde dous anos e medio a un ano e tres meses de prisión.
FEITOS
Segundo a resolución do tribunal, os feitos ocorreron entre 2021 e 2022, cando a vítima tiña 12 e 13 anos e o acusado tiña 18 anos de idade. Ambos convivían de forma esporádica no mesmo domicilio do partido xudicial do Carballiño debido á relación dos seus proxenitores, e a que os pais da vítima tiñan a custodia compartida.
A Audiencia considera probado que, aproveitando esa convivencia, o acusado entraba no cuarto de baño cando estaba a menor e que lle facía tocamentos "con ánimo libidinoso" nos peitos, glúteos e zona xenital por encima da roupa, chegando a baixarlle os pantalóns nalgunha ocasión.
Os maxistrados apuntan na sentenza que se basean no relato da vítima, que é "claro, reiterado e digno de crédito", un testemuño corroborado polas probas testificais e periciais. Ademais, hai un vídeo gravado pola menor, a iniciativa da súa irmá, "con obxecto de ilustrar sobre os tocamentos, intuíndo onde ían producirse" e que "contribúe ao esclarecemento da realidade dos feitos imputados".
Ademais da pena de prisión, que tivo en conta a atenuante de reparación do dano, a sala impuxo ao acusado a prohibición de achegarse a menos de 250 metros da vítima (do seu domicilio, lugar de estudos ou lugar en que se atope) e de comunicarse con ela por un período de 3 anos. Tamén establece unha indemnización de 5.000 euros polos danos morais. A sentenza non é firme, e contra ela cabe recurso de apelación.
