(Gráficas) O voto dos emigrantes, decisivo nun dos comicios máis abertos desde a época do bipartito

Case medio millón de galegos e galegas residen no estranxeiro, concretamente, 476.514, unha cifra que aumenta en cada cita electoral, sendo Arxentina, Cuba e Brasil os países con máis electores galegos residentes no exterior. Un voto que que pode decidir os comicios máis axustados dos últimos anos en Galicia.

E isto, non é a primeira vez que sucede. Cando Manuel Fraga perdeu en 2005 a maioría absoluta fiou á emigración a posibilidade de subir ata o escano 38. O foco estaba na provincia de Pontevedra, pero o reconto do voto exterior certificou o fin da era de Fraga á fronte da Xunta. Catro anos máis tarde, en marzo de 2009, o seu sucesor, Alberto Núñez Feijóo, logrou sumar 39 dos 75 escanos da Cámara autonómica na noite electoral. Posteriormente, o voto emigrante rebaixaría a súa maioría absoluta a 38 actas, ao gañar o PSOE un por Ourense en detrimento do PPdeG.

Ao agora líder do PP, en cambio, nas galegas de xullo de 2020, as últimas ás que se presentou en Galicia, o apoio dos emigrantes permitiulle a súa máis ampla maioría absoluta ao chegar ás 42 actas no hemiciclo galego --o reconto do sufraxio na diáspora inclinou esta vez a balanza ao seu favor ao arrebatarlle un escano ao PSdeG en Pontevedra, que sumou o PPdeG--. Algo que tamén pode acontecer nestes comicios, cando un deputado pode decidir a maioría para a dereita ou para a esquerda.

Segundo recolle o calendario electoral oficial dos comicios, publicado na web da Xunta Electoral de Galicia, o escrutinio dos votos dos residentes ausentes empezará o luns 26 e deberá estar finalizado como moi tarde o xoves 29 de febreiro. Constatado o volume ante unha nova cita coas urnas, a segunda sen voto rogado tras os comicios xerais de xullo de 2023, os partidos esperan expectantes comprobar o grao de participación.

Entre tanto, á marxe do volume que en si mesmo representa o voto emigrante, o censo de residentes ausentes (CERA) definitivo para o 18F, que publica o Instituto Nacional de Estatística (INE), reflicte tamén un incremento dos rexistrados en relación ao censo das últimas xerais --cunha alza de máis de 4.000 persoas--. Por circunscricións, a provincia da Coruña é a que rexistra un maior número de electores CERA 164.8421; seguida de Pontevedra, con 138.182; Ourense, con 103.832; e Lugo, con 69.658.

Se os resultados están moi axustados a noite do 18F haberá que agardar unha semana a ver que pasa. O escrutinio dos votos dos residentes ausentes empezará o luns 26 e deberá estar finalizado como moi tarde o xoves 29 de febreiro. 

VOTO POR CORREO

Correos informou xa que case 59.000 galegos emitiron xa o seu voto por correo para as eleccións deste domingo, o que supón un 37 % máis que nos comicios de 2016 e unha caída do 20 % en comparación cos datos de 2020, unhas eleccións con marca histórica de sufraxios a distancia nuns comicios marcados pola pandemia. Naquel entón, esa suba de participación deulle un escano máis a Feijóo.

En total, ata o peche do prazo na noite do pasado xoves, foron admitidos 58.903 votos, é dicir, o 93,72 % das 62.831 solicitudes cursadas para as eleccións nas que Galicia decidirá o seu Parlamento para os próximos catro anos. Comparativamente, o voto por correo cae un 20 % respecto das eleccións do 2020, nas que se alcanzou un teito histórico con 73.595 sufraxios.

Con todo, o número de voto por correo si sobe en comparación coas galegas de 2016 ao incrementarse, nas que se aceptaron 43.002 sufraxios, un 36,97 % menos que para a cita deste domingo. Por provincias, A Coruña foi na que máis votos se aceptaron (22.725), seguida de Pontevedra (18.980), Lugo (8.758) e Ourense (8.440).