Por Europa Press / Redacción | SANTIAGO DE COMPOSTELA | 05/03/2024 | Actualizada ás 14:35
A Asociación Galega de Linfedema (AGL) reclama máis atención, investigación, información e visibilización para os pacientes con esta enfermidade que afecta a uns 100.000 galegos, segundo as súas estimacións, e da que este mércores se conmemora o seu día mundial. "A pesar de ser un número considerable de persoas afectadas por esta patoloxía, non se lle presta a importancia que merece", denuncia nun comunicado esta entidade que tamén se dedica aos pacientes de lipedema, insuficiencia venosa crónica e outras patoloxías vasculares periféricas.
O presidente e fundador da AGL, Juan Manuel Lameiro, reivindica o labor desta asociación fundada en Vilagarcía de Arousa en 2004, cando a información sobre o linfedema "era practicamente inexistente", salvo algunhas publicacións que había en Internet "no idioma inglés".
Polo Día Mundial do Linfedema, Lameiro aproveita para facer un chamamento á sociedade e ás administracións para visibilizar as necesidades duns pacientes que, a día de hoxe, "non están cubertas". "Non sabemos o número real de persoas con linfedema, lipedema e insuficiencia venosa crónica, onde están esas 100.000 persoas con linfedema en Galicia?", pregunta o fundador da AGL.
Ademais, Lameiro denuncia que "non se inviste" en investigación, nin tampouco hai "suficientes profesionais preparados", nin o tratamento "chega a todas e todos" os que o necesitan, entre outras carencias. Por todo iso, a AGL reclama que haxa no Sergas unha estratexia de linfedema. A Asociación Galega de Linfedema aproveitará o día mundial desta enfermidade para, ademais de divulgar un vídeo e información por redes sociais, organizar outras actividades como talleres e campañas informativas en diferentes localidades galegas.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.