A manipulación na CRTVG será debatida na UE, segundo o BNG
Ana Miranda asegura que este tema está na orde do día da Comisión de Peticións do Parlamento Europeo.
- A CRTVG, o gran enigma do seu director xeral e a futura batalla política da XII Lexislatura
- O PPdeG sobre cambiar ao director xeral da CRTVG: "Depende das ganas do resto de forzas"
Por Galicia Confidencial | Bruxelas | 19/03/2024 | Actualizada ás 16:05
A eurodeputada do BNG, Ana Miranda, considera "moi importante" que a denuncia presentada polo Comité Intercentros da CRTVG pola manipulación na televisión e a radio públicas de Galicia -e defendida polo BNG- sexa incluída na orde do día da Comisión de Peticións do mes de abril, tal e como decidiu hoxe esta Comisión na reunión de coordinadores.
“É un triunfo do BNG que esta denuncia se debata no Parlamento Europeo e que se fale do que acontece na tele e radio públicas galegas”, subliña Ana Miranda, quen salienta que para acadalo foi fundamental a reclamación por parte do Bloque da elaboración dun informe xurídico que analizara as continuas manobras do Partido Popular, Vox e Ciudadanos para que non se debatera esta denuncia na Comisión de Peticións.
Nun comunicado, Miranda lembra que, precisamente, este informe foi o que deu a razón á eurodeputada galega para que a petición presentada polo Comité Intercentros da CRTVG fose tratada novamente na reunión de coordinadores da Comisión para valorar a súa inclusión na axenda. “Virán aquí en abril para denunciar a manipulación da TVG, para pedir medios públicos galegos de calidade, ecuánimes, e sobre todo para defender as súas condicións laborais”, indica.
