O Goberno pide á Xunta "deixar de dar voltas" e solucionar o problema da vivenda: "Un mozo non pode destinar o 80 % dos ingresos"

O delegado do Goberno en Galicia, Pedro Blanco, instou á Xunta a "deixar de dar voltas" para evitar declarar zonas de mercado residencial tensionado e pediulle que se "poña a traballar" en solucións ao problema da vivenda. Así se pronunciou ao ser preguntado nun acto en Santiago de Compostela polos requisitos que esixe a Xunta para aprobar estas declaracións, que solicitan municipios como A Coruña, Santiago e Pontevedra.

"Preocúpame a falta de consideración por parte da Xunta, que é quen ten as competencias, sobre o tema da vivenda", afirmou Blanco, que lamentou que a pesar de que existen os "mecanismos" e os "medios económicos" para achegar solucións, como "pode ser a declaración das zonas tensionadas para limitar os alugueres", a Xunta "siga dicindo que non". O delegado asegurou que "cando non son efectivos, os mercados intervéñense". "Pásanos coa banca, efectivamente houbo que intervila e, en moitas ocasións, temos un fondo de garantía de depósitos", exemplificou para soster que tamén debe "pasar coa vivenda".

Pedro Blanco considerou que "non ten moito sentido" que os mozos teñan que dedicarlle o "80 % dos seus ingresos ou un 90 %" a pagar o aluguer da vivenda para poder independizarse. "E no mecanismo que establece a lei de vivenda, que é nin máis nin menos que a declaración de zonas tensionadas, un dos requisitos é que hai que destinar máis do 30 % dos ingresos para pagar eses alugueres", dixo. "Por tanto, paréceme que é unha medida que hai que pór en marcha, que se puxo a disposición das comunidades autónomas", sostivo o delegado, que instou á Xunta a deixar de "dar voltas" e "porse a traballar" en "solucións reais".

Ademais, sobre o feito de que o Goberno galego esixa plans a longo prazo, Pedro Blanco lembrou que a propia lei establece que cada tres anos hai que revisar e considerou necesario "dar solucións inmediatas". "Non podemos agora prometer que imos facer un parque público de vivenda a 20 anos vista", sostivo o delegado, que asegurou que nos últimos 15 anos o número de vivendas públicas en Galicia é "absolutamente irrisorio". Así, aínda que recoñeceu que as medidas que pide o Goberno si están na lei, considerou que a Xunta pon trabas á declaración. "A Xunta ten que abrirse a recoñecer un problema real", sostivo.

Tras insistir en que a Xunta "ten que investir máis en vivenda, investir máis en rehabilitación e axudar aos mozos a que poidan acceder á vivenda, lembrou que a semana pasada o Goberno sacou unha liña de avais para que os mozos poidan acceder a este dereito. Unha medida, dixo, que se suma á declaración de zonas tensionadas como "instrumento máis inmediato" para dar solucións a "un problema real".