O 'Galiverso' da Cidade da Cultura estrea un proxecto de realidade virtual para coñecer gratis 11 museos galegos
Dixitalizáronse 27 obras de arte, restos arqueolóxicos e obxectos únicos para levar a cabo a experiencia.
Por Europa Press / Redacción | SANTIAGO DE COMPOSTELA | 25/03/2024 | Actualizada ás 14:19
O Museo Centro Gaiás presentou este luns a nova experiencia de realidade virtual 'Galiverso dos museos', dentro do marco do 'Galiverso', unha experiencia que, a través de lentes de realidade virtual, conecta a Cidade da Cultura con once centros que forman parte da Rede de Museos de Galicia.
Nesta nova montaxe interactiva, os espectadores poderán coñecer a colección artística, etnográfica e arqueolóxica conservada nos museos públicos galegos como o Museo do Mar de Galicia, o Museo das Peregrinacións e de Santiago e o Museo do Castro de Viladonga, entre outros, de forma gratuíta a partir deste martes na Cidade da Cultura.
Na presentación participou o conselleiro de Cultura, Educación, FP e Universidade en funcións, Román Rodríguez, que destacou "o potencial do 'Galiverso'", un proxecto que une arte e tecnoloxía para construír experiencias educativas e de lecer coas que descubrir o patrimonio galego, e que xa visitaron máis de 18.000 persoas.
Así, o conselleiro explicou que para construír o 'Galiverso dos museos' dixitalizáronse ata 27 obras de arte, restos arqueolóxicos e obxectos únicos cos que os visitantes poderán interactuar. Entre elas, atópanse algunhas das pezas máis significativas de cada centro, como a escultura do cabaleiro de Beade conservada no Museo Arqueolóxico Provincial de Ourense e o astrolabio máis antigo atopado en costas galegas, actualmente no Museo do Mar en Vigo, entre outros.
Ademais, esta iniciativa non é unha visita virtual completa aos museos, se non un adianto do que os espectadores poderán ver se os visitan en persoa, "un trailer que lles creará ganas de ir" e que incorpora a particularidade da 'persistencia' no mundo virtual, isto é, cada obxecto quedará na posición na que o anterior visitante o deixou, e poderase deixar pegada, literalmente, nun mural dentro do 'Galiverso', explicou Rodríguez.
INCLUSIVIDADE
Por outra banda, no deseño de todas as montaxes do 'Galiverso' empréganse controis intuitivos a través de xestos, textos e locucións explicativas de apoio, ademais de adaptar a experiencia para persoas con mobilidade reducida.
Pero o 'Galiverso dos museos' "dá un paso máis en inclusividade", incorporando unha zona táctil para "ver coas mans" réplicas impresas en 3D dalgunhas pezas da experiencia, así como a inclusión de auriculares de vía ósea e bucle magnético para persoas con dificultades auditivas.
Todas as persoas maiores de oito anos poderán visitar o 'Galiverso dos museos' de martes a domingo, reservando praza de forma gratuíta no Museo Centro Gaiás ou a través de Ataquilla.
