Cae parte do muro dunha vivenda en Sanxenxo debido ás fortes choivas
O alcalde, Telmo Martín, e o concelleiro de Medio Ambiente, Yago Torres, acudiron este martes ao lugar cun técnico municipal e a Policía Local para comunicar á dona do inmoble o perigo do estado da súa propiedade.
Por E.P. | SANTIAGO DE COMPOSTELA | 09/04/2024 | Actualizada ás 16:28
As intensas choivas rexistradas nas últimas semanas provocaron a caída de parte do muro dunha vivenda situada na praia da Carabuxeira, no municipio pontevedrés de Sanxenxo.
O alcalde, Telmo Martín, e o concelleiro de Medio Ambiente, Yago Torres, acudiron este martes ao lugar cun técnico municipal e a Policía Local para comunicar á dona do inmoble o perigo do estado da súa propiedade.
Ademais, Martín puxo en coñecemento de Costas de Pontevedra a situación e ordenou ao servizo municipal de Emerxencias precintar o acceso á zona por motivos de seguridade.
Na parcela anexa á vivenda, informan o Concello, hai xa tempo que o muro que sostiña a terra foi cedendo durante os temporais do inverno. A situación agora entraña máis perigo, xa que o muro non só sostén o xardín frontal da vivenda, se non tamén unha edificación usada como almacén ou garaxe.
O Concello de Sanxenxo leva tramitando desde o 2018 en Costas a recuperación da fachada marítima desta zona do litoral cunha pasarela que permita o acceso público e comunique a praia da Carabuxeira, Lavapanos e Panadeira. No último informe emitido por Costas incídese que en que neste momento só sería posible a instalación dun paseo de tipo desmontable ou de carácter fixo en servidume de tránsito que, na actualidade, está ocupada por diversos peches e edificacións, polo que se se decide facer un paseo fixo terá que ser mediante cesións voluntarias ou expropiacións.
Este proxecto inclúese dentro da recuperación do areal con outras dúas actuacións: a construción dun espigón rampla perpendicular á praia (unindo as rocas existentes) de case 100 metros por máis de dous de ancho para evitar a perda de area e a achega de 17.000 metros cúbicos de area procedentes da contorna da actuación, que se suman aos 10.000 metros cúbicos depositados en maio de 2021 e 3.000 metros máis en Lavapanos.
Estas actuacións, sinalou o Concello, requiren unha longa tramitación que, entre outros trámites, inclúe unha avaliación ambiental e a solicitude ante o Servizo Provincial de Costas dos títulos de ocupación necesarios para realizar o tres actuacións previstas.
