Grande incremento da venda de vivendas en Galicia que multiplica por seis a media estatal

A compravenda de vivendas en Galicia subiu un 38,4 % o pasado febreiro, en comparación co mesmo mes de 2023, ata situarse nos 2.090 inmobles, segundo datos publicados este luns polo Instituto Nacional de Estatística (INE), recollidos por Europa Press. Desta maneira, Galicia rexistrou un incremento seis veces superior ao da media estatal, xa que no total de España a compravenda de vivendas creceu un 5,8 % no segundo mes do ano, con 52.796 unidades.

En Galicia, 517 das vivendas comercializadas eran novas, case un 46,9 % máis, mentres que 1.573 eran usadas, un 37 % máis. Por outra banda, 2.009 tratábase de vivenda libre e os 81 restantes, protexidas. Por provincias, a compravenda de vivendas na Coruña subiu en febreiro un 30,4 %, ata 858 casas, mentres que en Lugo duplicouse, con 392 e en Ourense subiu un 43,6 %, ata 201. Pontevedra rexistrou o menor dos incrementos, cun 22,2 %, ata 639 vivendas.

En total, en Galicia transmitíronse 9.495 leiras, un 12,7 % máis que en febreiro de 2023, das cales 2.358 eran leiras rústicas e 7.137, urbanas. Destas últimas, 3.938 eran vivendas, sendo transmitidas por compravenda 2.090, mentres que 26 foron doazóns; 8, permutas; 1.016, herdanzas, e 798, outro tipo de transmisión.

A OFERTA E VIVENDA EN VENDA REDUCIUSE

Pola súa banda, a oferta de vivenda en venda reduciuse nas catro provincias galegas no primeiro trimestre do ano, segundo un estudo de Idealista, que asegura que no caso estatal baixa un 6 % en taxa interanual. A maioría de capitais de provincia españolas ten agora menos vivendas en venda das que había fai un ano e rexístranse tamén descensos en provincias como é o caso da Coruña, cun descenso do 12 %; Lugo, do 11 por cento; Ourense, do 7 % e Pontevedra, do 9 por cento.

Por outra banda, pisos.com, e en base aos últimos datos publicados polo Instituto Naciconal de Estatística (INE) en febreiro, resalta o feito de que a compravenda de vivendas suba por primeira vez "tras doce meses de caídas". "A vivenda a estrear dispárase e experimenta un crecemento da 20 % fronte ao aumento, en menor medida, da vivenda de segunda man", expón.