Greenfiber subliña que a planta de Altri en Palas de Rei non terá impacto sobre o Camiño de Santiago

Greenfiber destacou que o proxecto de fibras téxtiles de Palas de Reis, en Lugo, non terá impacto sobre o Camiño de Santiago, como así certifica un estudo independente, que conclúe que a fábrica practicamente non será visible desde a Ruta Xacobea, fóra de puntos moi concretos desde os que existirá unha visibilidade parcial e mínima.

Así o trasladou nun comunicado remitido este sábado aos medios, no que sinala que para o deseño do proxecto, seguiu as pautas e recomendacións dos organismos vinculados á Unesco como o Consello Internacional de Monumentos e Sitios (ICOMOS), a Unión Mundial para a Natureza (UICN) e o Centro Internacional de Estudos de Conservación e Restauración dos Bens Culturais (ICCROM), tal e como se recolle no seu estudo de impacto ambiental.

Deste xeito, Greenfiber sinalou que analizou o impacto no camiño mediante a elaboración de concas visuais e infografías, a localización e deseño da planta desde os 20 puntos escénicos claves da Ruta Xacobea e a súa contorna. Ademais, indicou que se estudou especialmente o Castelo de Pambre e a súa área de protección BIC, e do Castro de Remonde, integrando os seus valores, atributos e vulnerabilidade no marco do desenvolvemento do Proxecto, priorizando as accións de conservación e desenvolvemento.

Con estas premisas, sinalou que o deseño da planta inclúe medidas paisaxísticas de naturalización e singularización necesarias para seguir as pautas da Unesco e aproveitar, por unha banda, a orografía do terreo para situar as instalacións máis voluminosas nas zonas máis baixas, e crear un cinto verde perimetral de 67 hectáreas.

Este cinto verde, conforme indicou, suporá a integración de diferentes variedades de árbores como o Quercus robur (carballo), Castanea Sativa (castiñeiro), Betula celtibérica (bidueiro), Laurus nobilis (loureiro) ou Quercus Suber (alcornoque), unha especie, esta última, de especial interese polo aproveitamento da súa cortiza en varios municipios da comarca para a obtención e venda de cortiza. Ademais, a compañía propón engadir especies de arbustos como o Arbutus unedo (madroño), Pyrus cordata (piruétano), Lonicera periclyneun (madreselva) ou Crataegus monogyna (espino negro).

DIRECTRICES DA UNESCO

Tal e como sostivo o director do proxecto, Bruno Dapena, estas accións definíronse no marco dun estudo moi rigoroso a cargo dunha consultora independente, no que se analizaron as posibles repercusións potenciais sobre o Camiño de Santiago e outros elementos patrimoniais lindeiros como son o Castelo de Pambre e o Castro de Ramonde.

"Para a súa elaboración, contouse coa participación dun equipo experto en Ciencias Ambientais e Historia da arte que seguiron as directrices e metodoloxías de avaliación de impacto patrimonial definidas pola UNESCO, nas que se aglutinan as boas prácticas incluídas desde o seu tres órganos consultivos: o Consello Internacional de Monumentos e Sitios (ICOMOS), a Unión Mundial para a Natureza (UICN) e o Centro Internacional de Estudos de Conservación e Restauración dos Bens Culturais (ICCROM)", explica o directivo.

Outras accións de protección previstas, conforme destacou Greenfiber, son a canalización subterránea da auga e a rede eléctrica provisional para que non sexan visibles polos peregrinos, afastar do Camiño as actividades que poidan xerar emisións de po ou implementar durante a construción horarios de traballo que limiten o ruído nas horas máis sensibles.

Ademais, a compañía comprométese a establecer canles de diálogo coa comunidade local para escoitar as súas preocupacións e suxestións e axustar as medidas preventivas cando cumpra.

RESPOSTA DA PLATAFORMA ULLOA VIVA

A Plataforma Ulloa Viva nun comunicado recoméndalle á empresa que utilice o Sistema de Información Xeográfica de Parcelas (SIXPAC) da Xunta de Galicia, un sistema que “imaxinamos que avala a Xunta” e que demostra unha vez máis que a pasteira portugesa “minte sistemáticamente". A Plataforma xa presentou alegacións a respecto do impacto da macrocelulosa e a súa distancia “oficial e medida pola propia Xunta de Galicia” a respecto do Camiño Francés que pasa pola zona. A Plataforma considera “o colmo das mentiras desta empresa” que quera cambiar a xeografía galega e as distancias oficiais nos nosos mapas, para tentar lavar a caga (o famoso greenwashing) ao seu proxecto en Palas de Rei.

Desde a Plataforma Ulloa Viva consideran “inaudito” que a empresa “teña a cara dura” de dicir que no deseño do proxecto contaron coa recomendación de organismos coma o ICOMOS, cando esta asociación que asesora á Unesco vén de criticar fai menos dun mes o proxecto e demandar públicamente a Altri que se leve a cabo un novo informe ao respecto tendo en conta os impactos evidentes sobre o Camiño de Santiago. Ulloa Viva pídelle a Altri “que deixe de mentir aos galegos e galegas e de tratar por parvos aos medios de comunicación que coñecen perfectamente os posicionamentos de colectivos coma o ICOMOS”.