Educación quere reducir a burocracia dos centros escolares xa para o próximo curso
Por Europa Press / Redacción | SANTIAGO DE COMPOSTELA | 10/05/2024 | Actualizada ás 12:39
O conselleiro de Educación, Román Rodríguez, participou este venres en Santiago nunha reunión dos grupos de traballo para a simplificación administrativa nos centros educativos, cos que avanzou en medidas para tratar de reducir a carga burocrática dos colexios, algunhas das cales poderían implantarse xa o próximo curso.
Tal e como indicou o conselleiro en declaracións aos medios, o acordo sindical de mellora asinado hai poucos meses recollía a necesidade de "pór en marcha procedementos tendentes a reducir a tramitación burocrática" nos centros educativos, un labor que "sempre é unha carga" e "consome unha parte significativa do traballo dos docentes".
"O que se pretende, da man dos propios profesionais, é deseñar procedementos, procesos, que vaian orientados a reducir a carga burocrática que hai nos propios centros educativos", apuntou o conselleiro. Para iso, a temática se debate nos grupos de traballo que a consellería ten creados por cada nivel educativo e que están compostos por un inspector educativo e profesores e directores de centros.
Coa experiencia dos propios docentes, destacou Román Rodríguez, analizaranse os trámites que lles xeran máis carga e aqueles que se poden simplificar reducindo procesos ou facéndoos máis sinxelos, coa idea de que algunha das medidas "poida xa implementarse en setembro", de face ao próximo curso.
