Primeiro paso formal para lograr medios de xestión litoral: a Xunta pide convocar a Comisión Mixta de Transferencias

O Goberno galego decidiu na súa reunión semanal dar o primeiro paso formal encamiñado a lograr os medios humanos e técnicos necesarios para aplicar canto antes a lei do litoral, tras o aval do Tribunal Constitucional. Así, acordou solicitar ao Goberno central a convocatoria da Comisión Mixta de Transferencias para negociar. Explicouno o presidente galego, Alfonso Rueda, quen tamén destacou que a Xunta está a recibir "moitas peticións de información" doutras comunidades con costa para facer "unha normativa similar" que lles permita tamén "exercer estas competencias".

"A sentenza do TC é clara. Por tanto, agora é unha cuestión de vontade política e esperemos que o proceso sexa rápido e que non haxa ningún problema para o acordo", manifestou o xefe do Executivo galego, que, preguntado acerca de que outras competencias aspira a conseguir a Xunta, puxo o foco na AP-9. A este respecto, reafirmou que o obxectivo do seu Executivo é insistir na transferencia da AP-9 (que habería que tramitar pola vía lexislativa e a través do Congreso, onde decaeu na última convocatoria electoral a iniciativa que partira da Cámara autonómica).

Tamén manifestou (e así llo prevé trasladar ao presidente do Goberno, Pedro Sánchez, cando o reciba) que é "necesario" que transfira ás comunidades "máis capacidade de xestión nos fondos Next Generation". "Estamos a falar de centos de millóns, de miles de millóns, que a día de hoxe seguen sen mobilizarse por parte do Goberno central", aseverou. Ao seu modo de ver, conseguir unha maior capacidade de xestión sobre estes fondos sería "moi útil". "A partir de aí, iriamos a por máis", resolveu.

Reunión do Consello da Xunta | Fonte: DAVID CABEZON @ XUNTA