Pontón pídelle a Rueda e a Besteiro unha reunión para acadar "unha AP-9 galega e libre de peaxes"

A portavoz nacional do BNG, Ana Pontón, remitiu por carta ao presidente da Xunta e do PPdeG, Alfonso Rueda, e ao secretario xeral do PSdeG, José Ramón Gómez Besteiro, a súa proposta dun encontro con ambos os mandatarios para abordar "unha estratexia de país" a favor dunha AP-9 "galega e libre de peaxes".

Despois de que Bruxelas abrise expediente por segunda vez a España pola prórroga da concesión da AP-9, Pontón apunta na carta dirixida a Rueda e Besteiro que este é un momento "crucial" para lograr unha autoestrada "galega e libre de peaxes", polo que considera importante que os responsables políticos das principais formacións de Galicia manteñan unha reunión para "poder tecer unha estratexia de país" co obxectivo de alcanzar "unha demanda reclamada pola sociedade galega".

Así mesmo, a líder do BNG sinala tamén a conveniencia de celebrar esta reunión canto antes para axilizar todos os pasos que culminen "con éxito a transferencia da autoestrada libre de peaxes", tras lembrar que este é un dos obxectivos nos que o Bloque traballa "con rigor e coherencia desde hai anos", impulsando desde o Parlamento de Galicia a "elaboración e aprobación por unanimidade de sucesivas leis de transferencia que, con todo, non lograron a aprobación do Congreso".

Neste sentido, tal e como trasladou o BNG nunha nota de prensa, Pontón explica que no último intento, e tras a toma en consideración da lei galega por parte da Cámara baixa, o Bloque solicitara a súa tramitación urxente, unha petición que, engade, "foi desatendida porque tanto PP como PSOE presentaron emendas e solicitaron ata 17 prórrogas".

CRÍTICAS PPdG

Pola súa banda, o PPdeG pediu á portavoz do BNG, Ana Pontón, "menos afán de protagonismo" e "máis traballo con feitos" en relación á AP-9, despois de que a líder do Bloque propuxese a Alfonso Rueda e ao secretario xeral do PSdeG, José Ramón Gómez Besteiro, unha reunión para abordar a situación da autoestrada.

Nunha nota de prensa, os populares lembran que o BNG que agora esixe "unha estratexia de país" para a transferencia desta vía é o mesmo que "comprometía descontos nas súas peaxes a cambio do seu apoio á investidura de Pedro Sánchez". "O BNG que se opuxo á construción da AP-9 por considerala unha 'navallada á nosa terra' é o mesmo que agora a reivindica. O BNG que dicía que nunca permitiría que as peaxes seguisen subindo é o mesmo que calou cando o Goberno que apoian anunciou unha subida histórica este ano", manifestan os populares galegos.