Alcoa recibe ofertas non vinculantes para comprar a factoría de San Cibrao
Alcoa recibiu en maio ofertas non vinculantes, as cales serán vinculantes a partir de xuño, segundo a estimación realizada pola compañía nos últimos meses
Por Europa Press / Redacción | LUGO | 22/05/2024 | Actualizada ás 19:27
Alcoa atópase analizando ofertas non vinculantes de "potenciais interesados" recibidas polo complexo de San Cibrao, no municipio de Cervo (Lugo).
"Só consideramos efectuar unha venda baixo condicións específicas que permitan unha transferencia exitosa do complexo e que inclúa garantías tanto para os traballadores como para Alcoa", segundo explican fontes da compañía a Europa Press.
Tal e como estaba previsto, Alcoa recibiu en maio ofertas non vinculantes, as cales serán vinculantes a partir de xuño, segundo a estimación realizada pola compañía nos últimos meses.
"Estamos comprometidos a seguir traballando xunto a todos as partes implicadas para atopar unha solución que asegure a viabilidade económica a longo prazo das operacións en San Cibrao", expoñen as mesmas fontes. Polo momento aseguran que os detalles se manterán confidenciais e informarase "ao seu debido tempo aos implicados no proceso".
A pasada semana, o presidente de Alcoa, William Oplinger, advertiu de que "o éxito" de venda "depende da participación do Goberno e da flexibilidade dos sindicatos".
Igualmente, expuxo que "o negocio segue sendo inviable" en San Cibrao, cun potencial de aforro "limitado a curto e medio prazo". E é que "se espera que o efectivo se esgote na segunda metade de 2024" e incidía en que "Alcoa non achegará fondos adicionais".
