A Xunta esixe ao Goberno que a Lei de Vivenda "garanta a seguridade xurídica dos propietarios"
Critica que a orde do día da Conferencia sectorial non coincidiu co asunto tratado.
Por Europa Press / Redacción | SANTIAGO DE COMPOSTELA | 24/05/2024 | Actualizada ás 18:15
A conselleira de Vivenda e Planificación de Infraestruturas, María Martínez Allegue, acompañada polo director da Axencia de Turismo de Galicia, Xosé Merelles, e o secretario xeral de Vivenda e Urbanismo, Heriberto García Porto, participou este venres na reunión da Conferencia Sectorial de Vivenda e Axenda Urbana tras a que esixiu ao Goberno que a Lei de Vivenda garanta "a seguridade xurídica dos propietarios"
Tal e como trasladou a Xunta nunha nota de prensa, a conselleira agradeceu a convocatoria ministerial "no marco da colaboración coas comunidades autónomas e locais", aínda que lamentou que esta vontade de consenso "non se seguise antes coa aprobación da Lei estatal de Vivenda".
Así mesmo, a titular de Vivenda afirmou no encontro que Galicia foi unha das autonomías "pioneiras" en pór en marcha unha regulación "que funciona, avalada pola Xustiza, e que permitiu establecer un marco autonómico eficaz en relación ás vivendas de uso turístico".
Neste sentido, lembrou que a administración galega xa solicitou as vivendas que a Sareb ten en Galicia naqueles territorios onde existe demanda de vivenda. "E aínda non temos resposta", aseverou.
Por outra banda, Martínez Allegue reprochou que a orde do día da Conferencia -- o impacto dos pisos turísticos sobre a vivenda residencial a prezos accesibles-- non coincidiu co asunto tratado, xa que a ministra "expuxo a intención de adiantar o prazo final establecido polo regulamento europeo para a creación da Plataforma de datos sobre vivendas turísticas a finais de 2025, e quere contar coa colaboración das CCAA e entidades locais". Neste sentido, a representante autonómica demandou que esta plataforma sexa compatible coas que xa contan algunhas comunidades como a galega.
