O PP presume de unidade e non ve problema en deixar a presidencia da Cámara a un baltarista

O presidente do PPdeG, Alberto Núñez Feijóo, sinalou o luns que "nas listas do Partido Popular está a unidade que non acadaron a esquerda e o nacionalismo porque hai unha idea e un proxecto de país".

Así se expresaba o líder dos populares galegos esta tarde no acto de presentación da candidatura dos populares pola provincia da Coruña para o Congreso e o Senado con motivo dos vindeiros comicios xerais. 

Segundo destacou o presidente do PPdeG, as listas dos populares contan "con renovación grazas a persoas decididas a involucrarse e á xenerosidade dos que dan paso ás novas incorporacións". Así mesmo, fixo fincapé en que os conservadores renovan as listas con "experiencia política e experiencia de xestión." O líder dos populares galegos asegurou que nas listas do PP "hai certezas de gobernabilidade posto que forman equipos para gobernar".

Nestas listas figuran Pilar Rojo, presidenta do Parlamento de Galicia, e Paula Prado, deputada e ex-concelleira de Santiago. Cuestionado polo máis que probábel relevo de Rojo (vai de número 2 pola Coruña), Pedro Puy, voceiro parlamentar conservador, quitoulle ferro, argumentando que o PP ten canteira dabondo para remplazalas.

 

En declaracións a prensa o luns, Puy mostrouse tranquilo ante un eventual cambio na presidencia do Parlamento, que pasaría a Miguel Santalices, deputado ourensán do PP próximo a José Manuel Baltar. A delicada situación política e mediática do presidente da Deputación de Ourense, lastrada pola denuncia de sexo a cambio de traballo público, parece que non está a afectar as súas relacións co aparato do PP, a miúdo ciumento do poder ourensán.

 

A eventual desginación de Santalices e a defensa que até hoxe fixo Feijóo de Baltar indican que as relacións entre as dúas familias do PP galego son, polo de agora, en vísperas dos comicios, boas.