Vence ve "un despropósito" que o chamen a declarar no xuízo sobre Resistencia Galega
O voceiro e o secretario nacional do BNG terán que comparecer como testemuñas diante da Audiencia Nacional a raíz da Operación Jaro. A declaración está prevista para escasos días antes das eleccións xerais. "Xa é puntería", ironiza o líder do Bloque.
Por Galicia Confidencial | Santiago de Compostela | 25/11/2015 | Actualizada ás 11:17
"Ser citados como testemuñas o 14D polo asunto Causa Galiza é un despropósito pero farémolo con total tranquilidade com calquera testemuña". Así reaccionou o voceiro nacional do Bloque ao chamamento a declarar diante da Audiencia Nacional.
Xavier Vence e Bieito Lobeira, secretario de organización, deberán acudir ao tribunal en relación a última operación contra a banda terrorista Resistencia Galega. O 2 de novembro nove persoas foron detidas na Operación Jaro, todas elas membros da Executiva da pequena formación independentista Causa Galiza.
Descoñécese a razón concreta do xuíz Eloy Velasco para chamar a declarar como testemuñas a cúpula do Bloque. Consultadas por GC, voceiros oficiais da fronte indican que na citación recibida non se dan máis detalles. Lobeira, e non Vence, comparacerá ante os medios hoxe as 12 horas para afondar no asunto.
A Xustiza acusa aos membros de Causa Galiza de realizar varios actos de homenaxe a terroristas, en particular o último Día da Galiza Combatente, tanto de Resistencia Galega como do Exercito Guerrilleiro do Pobo Galego Ceibe. As acusacións son graves, especiamente porque entre elas está a de integración en organización terrorista.
Libres pero imputados, varios dos independentistas detidos deron unha rolda de prensa na que defenderon en todo momento a legalidade o seu traballo político. Na comparecencia en Vigo o 14 de novembro, denunciaron que se trata dun "atropelo judicial e policial" e criticaron ao Goberno por dicir que se "descabezara unha organización terrorista" cando “nom existem dados concretos nem objetivos que permitam à Guardia Civil nem à Audiencia Nacional determinar que esta organizaçom política desenvolve atividades ilegais”. Engadiron que son "pessoas que tenhem umha vida civil absolutamente normal com postos de trabalho e família com umha atividade política pública”.
Cando foron presos, a Executiva Nacional do BNG cualificou como "un ataque aos dereitos democráticos" a suspensión de actividade da organización independentista Causa Galiza, decretada polo dous anos e que os imputados din van recurrir. O Bloque tamén alertara do "acelerado retroceso no exercicio de dereitos democráticos que se está a dar na Galiza".
Tras o xiro cara o soberanismo do último lustro, o BNG achegouse a organizacións independentistas como Causa Galiza, mantendo reunións con elas na busca da unidade de acción do nacionalismo e chegando a explorar a posibilidade de presentarse xuntos as eleccións europeas de 2013 . O Bloque mantén dende sempre unha actitude clara de condena a violencia terrorista.
Vence e Lobeira deberán declarar como testemuñas o 14 de decembro, poucos días antes das eleccións xerais, nas que o BNG apoia a Nos Candidatura Galega, plataforma na que non participa Causa Galiza. "Cóstame imaxinar que utilidade lle pode ter a miña testemuña ao xuíz Velasco, pero citar para a última semana de campaña xa é ter puntería", declarou Vence esta mañá, sorprendido polo chamamento e ironizando sobre a proximidade da declaración coa cida electoral.
