De Lara investiga os contratos do Concello de Poio con Aquagest
Axentes de Vixiancia Aduaneira realizaron un operativo neste municipio gobernado polo BNG dentro da Operación Pokemon. Por outra banda, o TSXG confirma o procesamento da parlamentaria do PP, Soledad Piñeiro por presunta prevaricación.
Por Galicia Confidencial | Pontevedra | 02/12/2015 | Actualizada ás 17:24
Nova operación da xuíza Pilar de Lara en busca de posibles contratos fraudulentos dun concello coa empresa Aquagest (actual Viaqua) dentro do marco da Operación Pokemon. Se hai unhas semanas era Pontevedra, desta volta tocoulle a quenda ao municipio veciño de Poio, tamén gobernado polo BNG.
Varios axentes de Vixilancia Aduaneira acudiron a este concello para reclamar expedientes de contratación de obras realizadas pola empresa Aquagest, concesionaria do servizo de augas no municipio pontevedrés. Precisamente as investigacións sobre esta empresa ocupa unha das pezas separadas do groso sumario.
O operativo arrincaba ao dez da mañá. Os axentes pediron documentación das contratacións feitas por Aquagest en Campelo e Chancelas. Ademais, reclamaron todo documento relacionado coas contratacións desta empresa desde 2006 até a actualidade.
Poio únese así a Pontevedra na lista de municipios nos que De Lara puxo ultimamente o foco, aínda que en ambos os casos as solicitudes de información para buscar indicios de prevaricación ou subornos a cambios de adxudicacións non se traduciron en imputacións. A Pokemon salpicara previamente a outro municipio limítrofe con Pontevedra, Marín, aínda que neste caso en relación a outra das súas patas, a relativa á empresa Vendex, orixe da investigación.
Desde o goberno local de Poio manifestaron tranquilidade á vez que sinalan que a súa prioridade é a colaboración cos axentes en todo aquilo que lles requiran.
Procesamento dunha deputada do PP por prevaricación
Por outra banda, a Sala do Civil e Penal do Tribunal Superior de Xustiza de Galicia (TSXG) notificou este mércores un auto no que desestima os recursos de apelación interpostos contra o auto de procesamento da parlamentaria do PPdeG, Soledad Piñeiro, e o exalcalde de Carnota, o popular José Domingo Oreiro, por presunta prevaricación.
A sala dá por bos os argumentos do xuíz instrutor sobre a presunta prevaricación de Piñeiro cando sostén que "é indiferente" que no contrato de traballo inicialmente subscrito pola deputada aparecese o entón alcalde como representante do Concello, pois "foi ela mesma quen asumiu esa posición, derivada da imposibilidade que pesaba sobre o alcalde por un problema de saúde".
O auto sostén que, tras a presentación dunha denuncia pola presunta contratación irregular dunha traballadora, a instrución conclúe, de forma indiciaria, que "o contrato inicial, as súas prórrogas e as modificacións no seu contido, tiveron lugar sen seguir o procedemento administrativo correspondente". "Non houbo por conseguinte nin oferta pública, publicidade dalgún tipo ou suxeición en canto á elección da persoa indicada aos parámetros de mérito e capacidade", indica o TSXG.
Ademais, detalla que Piñeiro non se limitou a asinar aquilo que simplemente se lle presentou, senón que existen "indicios bastantes" que mostran que a súa participación foi "de todo punto activa nesa contratación carente de calquera procedemento administrativo de mínima consideración".
