Informe oficial desmonta as afirmacións da oposición sobre a aprobación das contas en Mondariz

Un informe da secretaria municipal de Mondariz, que foi remitido aos grupos da oposición, confirma que os orzamentos non están aprobado, segundo comunicou o goberno local en funcións.

Así, o equipo de Xoán Carlos Montes, que dimitiu en bloque hai unha semana, advertiu de que "ao contrario do que divulga estes días a oposición", as contas non foron aprobadas e, segundo o informe da secretaria, os orzamentos "constitúen a expresión conxunta sistemática das obrigacións que, como máximo, pode recoñecer a entidade e os seus organismos autónomos, e os dereitos que prevexan liquidar durante o exercicio correspondente". Así, o documento debe ser configurado pola Alcaldía e deberá ser informado por Intervención e remitido ao Pleno para a súa aprobación.

Dita aprobación, sinala, debe realizarse mediante un acordo único, sen que se permitan observacións ou fórmulas de salvagarda respecto dalgunha das súas previsións ou da documentación que o integra. Por tanto, expón o informe "en ningún caso a aprobación das emendas polo Pleno podería implicar a aprobación inicial do orzamento xeral".

O alcalde en funcións lamentou esta "perda de tempo" e acusou á oposición de tentar "impor a súa versión por encima dos informes" da secretaria. "As súas ganas de desinformar e confundir son tan esaxeradas que rozan a falta de ética, esquecen toda vocación de servizo á cidadanía e incorren en falsidades que pon en risco o futuro das veciñas e veciños, que afrontarán pagos máis altos de tributos e recibirán menos e peores servizos".

O goberno municipal, de Alternativa por Mondariz, presentou a súa dimisión hai unha semana polo "bloqueo absoluto" da oposición ás contas e a outras iniciativas, e convidou aos demais grupos a chegar a un acordo para asumir as rendas do Concello. O vindeiro xoves celebrarase un pleno para a elección dun novo goberno municipal.

Xoán Carlos Montes Bugarín, alcalde de Mondariz (Pontevedra). CONCELLO DE MONDARIZ