Por GC Tendencias | Arzúa | 03/03/2016 | Actualizada ás 17:00
A Festa do Queixo é unha celebración onde o queixo é o protagonista dende 1976. Un acontecemento anual que aporta valor engadido a Galicia e a Arzúa nos aspectos económico, cultural e didáctico. Como cada edición, estarán presentes gastronomía, música, cultura, tradición e innovación.
A programación desta edición comeza o 4 de marzo co 10º concurso de Tapas e Petiscos, organizado polo Consello Regulador da D.O. Protexida Arzúa-Ulloa e a Asociación de Empresarios da Comarca de Arzúa. Das 18 h. ás 23.30 h. pódense degustar en 25 establecementos de hostalaría de Arzúa as tapas participantes.
O recinto feiral “Terra do Queixo” será o punto de encontro e espazo de intercambio para artesáns, profesionais da gastronomía e visitantes que alí se citen. Abre o sábado 5 de 11 h. a 20.30 h. e o domingo 6 de 10 a 18.30 h. Calcúlase que haxa máis de 45 queixerías, algunhas de fóra de Galicia, dun total de 60 postos relacionados coa gastronomía. Nel terá lugar tamén actividades formativas, culturais e de lecer para pequenos e maiores e no posto da organización haberá un fotocol para “queixear” co mellor sorriso e 40 artigos de agasallo da festa.
O pregoeiro deste ano será o coñecido debuxante ourensán, Xosé Lois, coñecido polo seu característico personaxe “O Carrabouxo”. O pregón terá lugar no recinto feiral na inauguración oficial do evento o sábado 5 ás 13 h.
No apartado musical, o “Festival do Queixo” deste ano presenta unha variada programación. O sábado 5 a partires das 22.30 h. no campo da feira actuarán o rapeiro alacantino Nach, Miguel Campello, cantante de “elbicho” e para pechar a noite sesión DJ con Diego RJ. O domingo 6 na sesión vermú (13 h.) estará Troy, formación viguesa gañadora do concurso “Queixo Maquetón” e pola tarde a partir das 18 h. Andrés Penabad e Luar na Lubre que aproveita para presentar o seu novo traballo “Extra Mundi”. Todos os concertos son de balde.
Durante toda a fin de semana haberá como novidade curiosa deste ano Food-Trucks con petiscos doces e salgados feitos con queixo e tamén animación de rúa no recinto feiral e polas rúas de Arzúa coas formacións tradicionais Os Xirifeiros, Trópico de Grelos e As Sobreiras do Ulla. O sábado 5 ás 19 h. na Praza de Galicia concerto de Bringuelas (en caso de choiva no recinto feiral).
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.