O concello di que en Vigo "non hai desafiuzamentos" e critica á Xunta por non atallar esta problemática
"É unha vergoña, deberían estar calados –na Xunta-- porque é a súa competencia e non están a atender este problema", critica.
Por Galicia Confidencial | Vigo | 05/04/2016 | Actualizada ás 10:20
"Nesta cidade xa non hai desafiuzamentos porque é precisamente o Concello quen o evita cando tería que facelo a Xunta de Galicia, que non atende as súas obrigacións". Foi a contundente resposta que deu este luns o Concello de Vigo ás declaracións realizadas pola conselleira de Infraestruturas e Vivenda, Ethel Vázquez, nas que acusaba á corporación de "non implicarse" na loita contra os desafiuzamentos.
Nun comunicado, o goberno vigués lembra que paga "1.500 alugueres e hipotecas" con fondos municipais e que o Concello atende "calquera intento de desafiuzamento" mentres que a Xunta "unicamente atendeu na cidade seis casos".
"É unha vergoña, deberían estar calados porque é a súa competencia e non están a atender este problema", conclúe a nota.
