Piden penas de 3,5 a 6 anos de cárcere para 6 acusados por venda de cocaína e haxix na Mariña lucense

A Fiscalía reclama penas que oscilan entre 3 anos e medio e 6 anos de prisión para seis persoas acusadas de traficar con cocaína e resina de cannabis (haxix) na zona da Mariña lucense, e que serán xulgadas na sección segunda da Audiencia Provincial de Lugo, os días 10 e 11 de abril. Así, segundo o escrito de acusación pública, dúas dos procesados dedicábanse á venda de drogas na zona da Mariña nos anos 2021 e 2022 utilizando para iso un piso e un trasteiro situados na localidade de Foz. No momento das detencións e os rexistros dos seus domicilios atopáronse un total de 76 gramos de cocaína e máis de 130 gramos de haxix, ademais de 30.000 euros.

Para proverse do haxix, estes acusados contaron con outro dos procesados, en cuxo domicilio se atoparon 88 gramos desta droga e case 12.500 euros. Á súa vez, este acusado contacto con outro dos procesados, para conseguir a resina de cannabis. Ese provedor viaxou desde o País Vasco a Foz, e foi interceptado á súa chegada con 5,8 quilos desta droga. Para conseguir a cocaína, os vendedores tiñan como provedor, entre outros, a un quinto acusado, veciño de Vilalba, ao que lle compraron gran parte da cocaína intervida por algo máis de 8.000 euros. No domicilio deste provedor, localizáronse outros 101,5 gramos desta sustancia.

Finalmente, nesta causa está acusada unha sexta persoa, cliente de dous dos outros acusados, a quen compraba cocaína ocasionalmente e para quen tamén facía labores de venda. De feito, en xuño de 2022, esta persoa foi sorprendida tras facer unha entrega de 30 gramos de cocaína a un 'cliente'. Por estes feitos, a Fiscalía acusa a catro dos implicados dun delito de tráfico de drogas que causan grave danos á saúde, e aos outros dous atribúelles un delito de tráfico de drogas que non causan grave dano á saúde, en cantidade de notoria importancia. Así, pide para tres dos procesados a pena de 6 anos de cárcere; para outros dous acusados solicita 4 anos e medio de prisión; e para o sexto, a pena de 3 anos e medio de prisión. Igualmente, a Fiscalía reclama que paguen multas que suman, entre todos, máis de 162.000 euros.

Fachada do edificio da Audiencia Provincial de Lugo | Fonte: Arquivo