Investigan o ataque na cara dunha cadela a unha moza francesa de Erasmus en Ourense
A moza tivo que ser trasladada de urxencia ao hospital Álvaro Cunqueiro de Vigo, onde foi intervida por lesións que afectaron a unha fazula e ao lacrimal dun ollo.
Por Europa Press / Redacción | OURENSE | 02/05/2025 | Actualizada ás 19:10
A Policía Nacional investiga o ataque sufrido por unha moza francesa de 22 anos o pasado 23 de abril no barrio da Milagrosa, en Ourense, cando foi mordida na cara por unha cadela mentres regresaba ao seu domicilio con bolsas da compra. A vítima, que participa no programa Erasmus+, foi trasladada de urxencia ao hospital Álvaro Cunqueiro de Vigo, onde foi intervida por lesións que afectaron a unha fazula e ao lacrimal dun ollo.
O ataque ocorreu na rúa Irixo, e veciños da zona aseguraron que o animal xa protagonizara incidentes anteriores, como a morte de gatos e un can pequeno, e que o seu dono o usaba para intimidar. Aínda que non se confirmou oficialmente a súa raza, os residentes considérano potencialmente perigoso. A Unidade de Delincuencia Especializada e Violenta (UDEV) fíxose cargo das dilixencias. Mentres tanto, por parte de Progape sinalaron que non teñen coñecemento do paradoiro nin do estado do can, xa que "non recollen a animais que non están abandonados", permanecendo baixo a responsabilidade do seu propietario, quen debe garantir a súa corentena e "acudir a unhas citas co veterinario".
