Abre venres a solicitude de axudas para material escolar e libros, pero aínda non para alumnos 'E-Dixgal': estes son os requisitos
A petición poderá presentarse preferentemente pola vía electrónica, aínda que tamén nos propios centros e rexistros.
Por Europa Press / Redacción | SANTIAGO DE COMPOSTELA | 14/05/2025 | Actualizada ás 14:53
A Xunta abre este venres, 16 de maio, e ata o próximo 20 de xuño o prazo para solicitar as axudas á compra de libros de texto e material escolar para o próximo curso, así como para solicitar a inclusión no fondo de préstamo gratuíto. En concreto, a convocatoria publicarase este xoves no Diario Oficial de Galicia (DOG), segundo confirma o Goberno galego nun comunicado. Por primeira vez, os alumnos de centros que empreguen E-Dixgal, o programa do libro dixital, poderán acceder a este tipo de axudas pero regularanse a través doutro procedemento que se publicará con posterioridade.
Outra novidade será a implantación de desgravacións fiscais á adquisición de libros e material para familias con rendas per cápita de entre 10.000 e 30.000 euros. Tamén se detallarán proximamente. O curso actual, un total de 163.023 estudantes obtiveron libros de maneira gratuíta a través desta liña de subvencións. Ademais, 126.754 accederon a vales de material. A solicitude presentarase preferiblemente pola sede electrónica da Xunta, pero opcionalmente poderase facer de maneira presencial nos centros educativos e nos rexistros que establece a lexislación administrativa.
A petición para as axudas á compra de libros, o fondo e vales de material será única para todos os fillos dunha familia que estuden no mesmo centro. No caso de que estean en centros distintos, deberanse pedir por separado en cada un deles. No caso de que a solicitude se tramite por vía electrónica, a través da aplicación 'Fondolibros', será necesaria a presentación dunha por cada alumno escolarizado nun mesmo colexio ou instituto.
Vales para comprar material están dirixidos a familias con renda per cápital igual ou inferior aos 10.000 euros: un bono de 75 euros para rendas iguais ou inferiores a 6.000 euros; e de 60 euros para as de entre 6.000 e 10.000 euros. Iso si, o vale será sempre de 75 euros para o alumnado en situación de garda ou tutela por parte da Xunta, o de Educación Especial e o que teña necesidades específicas de apoio ou con discapacidade de polo menos o 33 %.
FONDO DE LIBROS
En canto ao fondo de libros, o alumnado de todos os cursos entre 3º de Primaria e 4º de ESO poderá acceder a el. Os de renda per cápita de ata 6.000 euros e os que estean baixo a garda ou tutela da Xunta teñen garantido o acceso a seis manuais, e os do tramo de 6.000 a 10.000 poderán recibir catro. Tanto para acceder ao fondo como para recibir as axudas de libros e material é requisito fundamental devolver os manuais recibidos o curso anterior. Tamén pode ocorrer que o colexio deba adquirir algún libro adicional por non ser suficientes os que ten no fondo. Nese caso, a Xunta abonará 40 euros por cada un de Primaria e 45 pola ESO.
AXUDAS PARA MERCAR LIBROS
No que respecta ás axudas para a adquisición de libros polas familias, accederán as que teñan nenos de 1º e 2º de Primaria --os libros destes niveis non son reutilizables-- e o resto que non poidan empregar os do fondo. En Educación primaria, estes vales serán de 240 euros para as familias con rendas de ata 6.000 euros per cápita e de 160 para as de 6.000 a 10.000 euros. Na ESO, os importes sitúanse en 270 euros no primeiro tramo de renda e en 180 no segundo.
Ademais, obterán sempre axudas para libros por 300 euros todos os alumnos de Educación Especial --tanto en centros específicos como en unidades en Educación Especial de centros comúns--, así como para os de Primaria e ESO con necesidades específicas de apoio ou con discapacidade de polo menos un 33 %, sempre que non poidan acceder ao fondo. Se estes últimos colectivos poden empregar libros do fondo, recibirá o máximo de seis, tamén con independencia da renda. O alumnado en situación de garda ou tutela da Xunta segue recibindo o importe do primeiro tramo, con independencia da renda, é dicir: 240 euros en Primaria e 270 na ESO.
ACCESO EN E-DIXGAL
Para o próximo curso, por primeira vez os alumnos que empreguen 'E-Dixgal' poderán acceder a axudas para libros. Non entanto, regularase por separado, xa que son os centros que participan no programa os que decidan se combinan o uso de material dixital con ata tres manuais. Tal e como avanzaron a semana pasada responsables da Consellería de Educación, tamén se outorgarán en función da renda de cada familia. Para Primaria, as que teñan ingresos de ata 6.000 euros poderán acceder a tres libros; entre os 6.000 e os 10.000, a dous libros; e entre 10.000 e 30.000 euros, terán desgravacións fiscais. Para a ESO, dous libros para familias que ingresen un máximo de 6.000 euros; un libro para as que ingresen de 6.000 a 10.000 euros; e desgravacións fiscais para as que teñan rendas de 10.000 a 30.000 euros.
