Aumenta a cibercriminalidade en Galicia: o 30 % dos delitos no primeiro trimestre do ano empregaron medios informáticos
Galicia sitúase case 15 puntos por baixo da taxa de criminalidade rexistrada no conxunto de España e baixan os delitos convencionais nun 3,3 %.
Por Europa Press / Redacción | SANTIAGO DE COMPOSTELA | 14/05/2025 | Actualizada ás 15:37
Os delitos convencionais descenden un 3,3 % en Galicia no primeiro trimestre de 2025 con respecto ao mesmo período do ano pasado e consolídase como a terceira comunidade máis segura. Con todo, os ciberdelitos aumentaron un 14 %. Así figura no Balance de Criminalidade que publica este mércores o Ministerio do Interior e que recolle todas as infraccións penais rexistradas por comunidades autónomas, provincias, illas, capitais e localidades de máis de 20.000 habitantes.
Segundo o documento, entre xaneiro e marzo deste ano producíronse en toda Galicia 23.308 infraccións penais, un 1 % máis que os 23.058 que se cometeron neste mesmo período do 2023. A taxa de criminalidade en Galicia é de 35,3 delitos por cada 1.000 habitantes, a mesma cifra rexistrada no trimestre inmediatamente anterior. Con respecto á media nacional, a Comunidade galega sitúase case 15 puntos por baixo da taxa de criminalidade rexistrada no conxunto de España.
A ciberdelincuencia, volve a repuntar no primeiro trimestre deste 2025 cunha subida do 14 % con respecto ao mesmo período do ano anterior. Este aumento débese, fundamentalmente, ás estafas informáticas que subiron un 16,3 %. Así en 2024 producíronse 4.886 e no mesmo período deste ano un total de 5.680. Os datos recolleitos, segundo explicou a Delegación do Goberno, indican que case o 30 % dos delitos coñecidos en Galicia entre xaneiro e marzo usaron medios informáticos na súa execución e que nove de cada 10 inscríbense na categoría de estafas.
BAIXAN OS DELITOS CONVENCIONAIS
En canto aos delitos convencionais rexistrados polo Ministerio do Interior en Galicia mostran unha diminución, xa que baixaron un 3,3 %, ata os 16.783. En detalle, os delitos contra a liberdade sexual descenderon un 2,1 %, ao producirse 187 --catro menos-- no primeiro trimestre de 2024 en comparación ao ano pasado. Ademais, as agresións sexuais con penetración diminuíron un 23,6 %, de 55 a 42. En referencia aos homicidios dolosos e asasinatos en Galicia, pasaron de 5 a 1, unha baixada do 80 %; pero as tentativas aumentaron de 8 a 15, un 87,5 %. Así mesmo, as lesións e as rifas tumultuarias creceron un 6,6 %. Pola súa banda, os roubos con violencia e intimidación diminuíron un 5,8 %, de 241 a 227 e os roubos con forza en domicilios baixaron un 9,1 %, ao pasar de 649 a 590. En canto aos delitos de tráfico de drogas situáronse nos 113 --11 menos que o mesmo período do ano anterior--.
EFICACIA POLICIAL
Pola súa banda, o delegado do Goberno en Galicia, Pedro Blanco, enxalzou os resultados dos Corpos e Forzas de Seguridade que apuntan a unha "melloría" da eficacia policial en Galicia. No primeiro trimestre deste ano, a taxa alcanzou o 44,1 % das infraccións penais coñecidas en Galicia, un 2,3 % máis elevada que a do última trimestre e a mellor do últimos oito anos. Así mesmo, celebrou que Galicia revalide, no que vai de ano, a súa posición como a terceira comunidade máis segura de España.
DATOS ESTATAIS
A criminalidade descendeu un 2,8 % no conxunto de España no primeiro trimestre de 2025 cunha caída dos homicidios dolosos e asasinatos consumados do 11,6 %, aínda que en grao de tentativa soben case un 20 %, e unha baixada dos delitos contra o patrimonio do 5,3 %, que inclúen indicadores de roubos, furtos e subtracción de vehículos --que representan dous de cada cinco delitos convencionais--. Con todo, os delitos contra a liberdade sexual aumentaron un 3,8 % e as agresións sexuais con penetración (violacións) un 7,6 % en comparación co mesmo período de 2024. A cibercriminalidade tamén baixou un 1,2 %, coas estafas informáticas --a maioría deste tipo de delitos no plano virtual-- marcando un descenso do 3,5 % entre xaneiro e marzo de 2025.
