A Xunta retoma o Plan do Lobo e habilita máis de 2 millóns en axudas para a súa xestión
O BNG e o PSdeG critican a estratexia do Goberno galego mentres a Xunta defende un equilibrio entre fauna e actividade agrogandeira
Por Europa Press / Redacción | SANTIAGO DE COMPOSTELA | 16/05/2025 | Actualizada ás 18:17
A reactivación do Plan de Xestión do Lobo en Galicia centrou este venres o debate político na Comisión de Ordenación Territorial, Medio Ambiente e Servizos do Parlamento galego. A directora xeral de Patrimonio Natural, María Sol Díaz Mouteira, informou das liñas de actuación previstas pola Xunta neste ámbito, que inclúen máis de 2 millóns de euros en axudas para previr e paliar os danos ocasionados pola fauna silvestre, en especial polo lobo, no medio rural.
O Executivo autonómico anunciou a creación de tres liñas específicas de apoio económico, que suporán un incremento do 50 % nas indemnizacións e un 10 % máis nos supostos cubertos polas achegas. Estas medidas enmárcanse dentro dun plan máis amplo dotado con 5,9 millóns de euros, orientado á protección da biodiversidade e á regulación das actividades cinexéticas e piscícolas.
A decisión foi criticada pola oposición. O deputado do BNG, Luís Bará, cualificou a proposta como unha mostra de "lobofobia" e acusou ao Goberno galego de "empregar ao lobo como chibo expiatorio para ocultar os problemas estruturais do rural". Pola súa banda, a representante do PSdeG, Pomba Castro, advertiu de que "a caza non resolve o conflito de fondo e mesmo pode aumentar os ataques ao romper os grupos sociais da especie".
En resposta ás críticas, Mouteira defendeu que antes da suspensión do plan no ano 2021, "existía unha convivencia equilibrada entre o lobo e as explotacións agrogandeiras". A oposición, porén, negou esa visión e insistiu en que os ataques eran frecuentes tamén naquel período.
No marco da mesma comparecencia, a Xunta detallou outras actuacións previstas para 2025 en materia de conservación ambiental. Destaca un investimento de 2,8 millóns de euros para o Parque Nacional Marítimo Terrestre das Illas Atlánticas, así como apoio económico á Rede Galega de Parques Naturais. Tamén se avanzará na creación do primeiro centro público de acollida de animais de compañía abandonados, con 1,4 millóns de euros destinados a entidades locais e protectoras para garantir o seu coidado e benestar.
