A suba do prezo do aluguer non ten fin en Galicia: xa está por riba dos 800 euros mensuais
O municipio de Sanxenxo é o que máis se incrementa en Galicia en abril (+21,5%), seguido de Ferrol (+19,7%).
Por Europa Press / Redacción | Compostela | 19/05/2025 | Actualizada ás 11:24
O prezo da vivenda de aluguer subiu un 10,6% en Galicia en abril de 2025 en comparación co mesmo mes de 2024, de forma que o prezo sitúase por encima dos 800 euros nun piso medio de 80 metros, segundo datos do portal inmobiliario Fotocasa publicados este luns.
Deste xeito, o prezo do aluguer sitúase en 10,01 euros por metros cadrados en Galicia en abril. Supón un 2,5% máis que o mes anterior, marzo. Por provincias, a de Lugo é a que experimenta maior alza (+19,6%), seguida de Ourense (+15,9%), A Coruña (+12,2%) e Pontevedra (+5,6%). O municipio de Sanxenxo é o que máis se incrementa en Galicia en abril (+21,5%), seguido de Ferrol (+19,7%).
DATOS ESTATAIS
O prezo da vivenda en aluguer en España subiu un 12,9% en abril en taxa interanual, ata superar os 1.100 euros ao mes de media para un piso medio de 80 metros cadrados, mentres que a súa variación mensual incrementouse un 2,5%, segundo os últimos datos proporcionados por Fotocasa.
