Priorizar mulleres e persoas de baixo nivel socioeconómico nas patoloxías cardiovasculares: "Se hai algo que mata, é ser pobre"
A asociación de pacientes Cardioalianza asevera que en Galicia hai unha atención "desigual", en función do hospital, destas enfermidades.
Por Europa Press / Redacción | SANTIAGO DE COMPOSTELA | 22/05/2025 | Actualizada ás 19:10
A organización de pacientes Cardioalianza organizou este xoves en Santiago unha mesa redonda na que o doutor José Ramón González Juanatey, xefe do servizo de Cardioloxía do Hospital Clínico de Santiago, e outros profesionais sanitarios pediron priorizar a mulleres e persoas de baixo nivel socioeconómico nos tratamentos e accións contra as enfermidades cardiovasculares, por ser os perfís máis propensos a padecelas.
Neste coloquio no compostelán Hotel Xelmírez participaron, á parte de González Juanatey, a médica de familia Pilar Alonso (centro de saúde A Ponte, en Ourense), o médico internista José Manuel Cerqueiro (Hospital Universitario Lucus Augusti de Lugo) e a enfermeira María González (centro de saúde de Celanova). O moderador comezou cun chamamento a orientar as políticas contra as patoloxías cardiovasculares "cara á muller", algo no que os expertos levan anos insistindo. "É necesario lexislar cunha orientación de xénero", recalcou González Juanatey.
O xefe de Cardioloxía do hospital compostelán explicou que, en casos que son asimilables, débese priorizar a atención a mulleres "con sospeita de enfermidade cardiovascular ou que estean pendentes dalgún tipo de técnica ou proba". E é que, mentres que para os homes son a segunda causa de morte, para as mulleres son a primeira. Coa mesma premisa, débese pór o foco nas persoas de menores niveis socioeconómicos, porque son as que realizan maiormente traballos que requiren esforzo físico e que seguen menos hábitos saudables, o que vai asociado a un maior índice de obesidade. "Se hai algo que mata, é ser pobre", aseverou o doutor González Juanatey.
CUESTIÓN DE "ESTILO DE VIDA"
Nisto coincidiu coa enfermeira María González, quen subliñou que todo é cuestión de "estilo de vida". É máis, segundo explicou a médica de familia Pilar Alonso, os pacientes de niveis socioeconómicos máis baixos van menos a probas rutineiras e "acoden a consulta de forma aguda", é dicir, cando a ameaza sobre a saúde é inminente. Estes pacientes tamén teñen menos oportunidade de acceder a actividades que son "beneficiosas para a súa saúde", como dispor de tempo libre para practicar algún deporte ou levar unha alimentación saudable, "porque comer ben é máis caro". Alonso chamou a "concienciar" a estas persoas de que están en risco, mentres que González puxo o foco na importancia da "prevención desde pequenos".
UN PLAN AUTONÓMICO
A xornada no Hotel Xelmírez, á que asistiron representantes dos principais partidos con representación no Parlamento galego --PP, BNG e PSdeG--, inaugurouna o presidente da organización de pacientes Cardioalianza, Tomás Fajardo. Tal e como detallou, as patoloxías cardiovasculares son a primeira causa de morte en España e en Galicia. "Cabe preguntarnos se estamos a facer todo o que está nas nosas mans", reflexionou. Fajardo destacou que Galicia está "nunha posición idónea para liderar un modelo de atención cardiovascular integrado, equitativo e máis coordinado".
Así, reclamou que se desenvolva un plan autonómico "aliñado co estatal, pero adaptado ás particularidades" da Comunidade. De feito, o presidente de Cardioalianza criticou que, en Galicia, o acceso aos programas "é desigual, segundo o hospital ou a provincia". Nisto mesmo profundou o secretario da Asociación de Cardiópatas e Anticoagulados da Coruña (Apacam), Emilio Ferreiro, quen cuestionou que no complexo hospitalario coruñés (Chuac), que é "enorme", non terá un servizo de rehabiltiación en Cardioloxía ata finais de 2026, cando finalice a súa ampliación.
"A rehabilitación non é un complemento da enfermidade, senón unha parte esencial do tratamento", insistiu Tomás Fajardo, para facer un chamamento a pór aos pacientes e as súas demandas "no centro". Na inauguración tamén interveu a directora de Coordinación da Fundación Pública Urxencias Sanitarias-061, Olga Dosil, quen destacou diversas iniciativas postas en marcha en Galicia --como o 'Código Ictus' e programas de formación en reanimacións cardiopulmonares-- baixo a premisa de que, ante un episodio cardiovascular, "cada segundo conta".
