Comeza a matrícula nas escolas infantís públicas galegas: prazo ata o 13 de xuño
O trámite inclúe o impreso cuberto e a cartilla de vacinación; a atención seguirá sendo gratuíta no curso 2025-2026.
Por Europa Press / Redacción | Santiago de Compostela | 01/06/2025 | Actualizada ás 12:25
A Xunta abrirá este luns o prazo para que as familias poidan formalizar a matrícula do curso 2025-2026 nas escolas infantís da rede pública autonómica. Segundo adiantou o Goberno galego nunha nota de prensa, a documentación poderá presentarse ata o 13 de xuño.
En concreto, as familias deberán presentar o impreso de matrícula cos datos cubertos xunto coa copia da cartilla de vacinación do menor. Un trámite que poderá realizarse a través da sede electrónica da Xunta ou no centro no que se obtivo a praza.
Deste xeito, o Executivo galego destacou que, unha vez iniciadas as matriculacións, as listas de espera iranse modificando e depurando, realizando novos chamamentos para prazas vacantes. Debido á duplicidade de solicitudes, xa que haberá familias que figuren en varias listas de diferentes escolas e tamén en escolas infantís doutras administracións e entidades.
Con todo, o inicio do curso nos centros de 0 a 3 anos está fixado para o día 5 de setembro. Neste contexto, a Xunta lembrou que este será o cuarto ano consecutivo no que a atención educativa de 0 a 3 anos será de novo gratuíta en todas as escolas infantís de Galicia, tanto nas públicas como nas privadas e nas de iniciativa social.
