A vivenda pública en mans da Sareb: Galicia conta con 1.756 casas e 2.654 chans
Os inmobles están en distintas situacións, desde a venda ata a cesión a concellos para usos sociais.
Por Europa Press / Redacción | Santiago de Compostela | 01/06/2025 | Actualizada ás 12:53
A Sociedade de Xestión de Activos procedentes da Reestruturación Bancaria (Sareb) dispón de máis de 1.750 vivendas en Galicia e 2.654 chans, segundo informa a Secretaría de Estado de Relacións coas Cortes e Asuntos Constitucionais a unha pregunta formulada polo deputado do BNG, Néstor Rego.
En concreto, este organismo, dependente do Ministerio de Economía, Comercio e Empresa, posúe en propiedade ata 1.756 vivendas na Comunidade. Con todo, explica que estes inmobles poden atoparse en diferentes situacións, xa sexa en comercialización, en adecuación ou cedidos a administracións públicas para aluguer sociais, entre outras.
Segundo a súa páxina web, a maioría das vivendas atópase na provincia da Coruña, superando o milleiro. En Pontevedra roldan as 400 e en Lugo non alcanzan as 200. Ourense é a provincia na que menos vivendas posúe, con case unha vintena.
